;
Athirady Tamil News

பயங்கரவாதத்துக்கு எதிரான கூட்டு பயிற்சியில் இந்தியா-பாகிஸ்தான் ராணுவம் பங்கேற்பு..!!

0

எஸ்.சி.ஓ. என்னும் ஷாங்காய் ஒத்துழைப்பு அமைப்பு 2001-ம் ஆண்டு ரஷியா, சீனா, கிர்கிஸ்தான், கஜகஸ்தான், தஜிகிஸ்தான், உஸ்பெகிஸ்தான் ஆகிய நாடுகளின் அதிபர்களால் உருவாக்கப்பட்டது.

இந்த அமைப்பில் 2005-ம் ஆண்டு, இந்தியாவும், பாகிஸ்தானும் பார்வையாளர்களாக சேர்த்துக்கொள்ளப்பட்டன. இவ்விரு நாடுகளும் கடந்த ஆண்டு, ஷாங்காய் ஒத்துழைப்பு அமைப்பு உறுப்பினர்களாக சேர்த்துக்கொள்ளப்பட்டன.

நேட்டோ அமைப்புக்கு சமமாக இந்த அமைப்பு கருதப்படுகிறது. இந்த அமைப்பின் உறுப்பு நாடுகள் அனைத்தும் ஒன்று சேர்ந்து பயங்கரவாத தடுப்பு நடவடிக்கையாக கூட்டாக ராணுவ பயிற்சியில் ஈடுபட முடிவு செய்யப்பட்டு உள்ளது.

இந்த பயிற்சியின் முக்கிய நோக்கம், ஷாங்காய் ஒத்துழைப்பு நாடுகள் இடையே பயங்கரவாத தடுப்பு ஒத்துழைப்பை அதிகரிப்பதாகும்.

இந்த ராணுவ பயிற்சியில் இந்தியாவும், பாகிஸ்தானும் இடம் பெறுகின்றன. இந்தியா இடம் பெறுவதை ராணுவ மந்திரி நிர்மலா சீதாராமன் கடந்த வாரம் ஷாங்காய் ஒத்துழைப்பு அமைப்பு ராணுவ மந்திரிகள் கூட்டத்தில் பங்கேற்க பீஜிங் சென்றிருந்தபோது, உறுதி செய்து விட்டார். இந்த கூட்டு ராணுவ பயிற்சி, ரஷியாவில் உள்ள உரல் மலைப்பகுதியில் செப்டம்பர் மாதம் நடைபெறுகிறது.

ஐ.நா. அமைதிப்படையில் இந்தியாவும், சீனாவும் ஒன்றாக பல முறை இடம் பெற்று இருந்தபோதும், கூட்டு ராணுவ பயிற்சியில் இதுவரை ஈடுபட்டது இல்லை.

சுதந்திரத்துக்கு பின்னர் இப்போதுதான் எதிர் எதிர் துருவங்களில் உள்ள இந்தியாவும், பாகிஸ்தானும் கூட்டு ராணுவ பயிற்சியில் பன்னாட்டுகளுடன் பங்கேற்க போவது குறிப்பிடத்தக்கது.

You might also like

Leave A Reply

Your email address will not be published.

15 − 1 =

*