;
Athirady Tamil News

இந்தியாவின் ஆயுள்கால தோழனாக நீடிப்பேன் – மோடி சந்திப்பின்போது ஜப்பான் பிரதமர் நெகிழ்ச்சி..!!

0

இந்தியா – ஜப்பான் இடையிலான 13-வது உச்சி மாநாட்டில் பங்கேற்பதற்காக பிரதமர் நரேந்திர மோடி இருநாள் அரசுமுறைப் பயணமாக நேற்று டோக்கியோ வந்தடைந்தடைந்தார்.

அவருக்கு டோக்கியோவில் உள்ள ஹனேடா விமான நிலையத்தில் ஜப்பான் அரசின் சார்பில் சிறப்பான வரவேற்பு அளிக்கப்பட்டது. ஜப்பான் மந்திரிகள், உயரதிகாரிகள் மற்றும் ஜப்பானுக்கான இந்திய தூதர் ஆகியோர் இந்த வரவேற்பு நிகழ்ச்சியில் கலந்து கொண்டனர்.

பின்னர், அங்கிருந்து இம்பரீயல் ஹோட்டலுக்கு சென்ற மோடியை ஜப்பானில் வசிக்கும் இந்தியர்கள் அன்புடன் வரவேற்றனர். அவர்களுடனான கலந்துரையாடல் நிகழ்ச்சியில் பங்கேற்ற மோடி இன்று யாமானாஷி நகருக்கு வந்தார்.

அங்கு ஜப்பான் பிரதமர் ஷின்ஸோ அபே-வை சந்தித்த மோடி, இந்தியாவில் இருந்து கொண்டுசென்ற கலைநயம் மிக்க நினைவுப் பரிசுகளை அவருக்கு அளித்தார்.

ஜப்பானின் மிகப்பெரிய சிகரத்தை கொண்ட பியூஜி மலையின் அடிவாரத்தில் அமைந்துள்ள யாமானாஷி நகரில் உள்ள உலகின் மிகப்பெரிய ரோபோட் தயாரிப்பு தொழிற்சாலையை மோடி பார்வையிட்டார். பின்னர் இருவரும் இங்குள்ள பிரபல உணவகத்தில் மதிய உணவு அருந்தினர்.

இங்குள்ள தனது ஓய்வு இல்லத்தில் ஜப்பான் பிரதமர் ஷின்ஸோ அபே பிரதமர் மோடிக்கு இன்று இரவு விருந்து அளிக்கிறார். பின்னர், இரு நாட்டின் பிரதமர்களும் இங்கிருந்து சுமார் 110 கிலோமீட்டர் தூரத்தில் உள்ள தலைநகர் டோக்கியோவுக்கு ரெயில் மூலம் வருகின்றனர்.

நாளை (திங்கட்கிழமை) டோக்கியோவில் நடைபெறும் பேச்சுவார்த்தையில் இருநாடுகளுக்கு இடையில் பாதுகாப்பு மற்றும் இந்தோ-பசிபிக் பகுதியில் நிலவும் அரசியல் பிரச்சனைகள் தொடர்பாக விவாதிக்கப்படும் என எதிர்பார்க்கப்படுகிறது.

இதற்கிடையில், இந்தியா – ஜப்பான் பிரதமர்களுக்கு இடையிலான 13-வது உச்சி மாநாடு தொடர்பாக நாளிதழ்களுக்கு சிறப்பு கட்டுரை ஒன்றை ஜப்பான் பிரதமர் ஷின்ஸோ அபே எழுதியுள்ளார்.

1957-ம் ஆண்டில் அந்நாள் பிரதமரான தனது தாத்தா நோபுசிக்கே கிஷி ஜப்பானின் முதல் பிரதமராக இந்தியாவுக்கு சென்ற சம்பவத்தை தனது கட்டுரையில் அவர் நினைவுகூர்ந்துள்ளார்.

அப்போது ஜப்பான் அவ்வளவு வளமாக இல்லாத காலக்கட்டத்தில் இந்திய பிரதமர் நேரு டெல்லியில் எனது தாத்தா நோபுசிக்கே கிஷி-யை எனது மரியாதைக்குரிய ஜப்பானின் பிரதமர் என பல்லாயிரக்கணக்கான மக்களின் முன் அறிமுகம் செய்தார். அதன் பிறகு ஜப்பானுக்கு 1958-ம் ஆண்டிலிருந்து ஏராளமான நிதியுதவி கிடைக்க ஆரம்பித்தது.

இதை எல்லாம் மனதில் வைத்து இந்தியாவுடனான நட்புறவுகளை பலப்படுத்துவதற்கு என்னை அர்ப்பணித்துக் கொண்டிருக்கிறேம். உலகின் மிகப்பெரிய ஜனநாயக நாடான இந்தியாவுக்கு கடந்த 2007-ம் ஆண்டில் நான் சென்றபோது அந்நாட்டின் பாராளுமன்றத்தில் உரையாற்றும் கவுரவம் எனக்கு அளிக்கப்பட்டது.

இந்திய பிரதமர் மோடியின் மாநிலமான குஜராத்துக்கு கடந்த ஆண்டு செப்டம்பர் மாதம் நான் சென்றபோது அகமதாபாத் நகர மக்கள் அளித்த மகத்தான அன்பான வரவேற்பை என்னால் மறக்கவே முடியாது.

அதையும் எனது தாத்தாவுக்கு முன்னர் இந்தியா அளித்த வரவேற்பையும் மனதில் இருத்தி என் வாழ்நாள் முழுவதும் இந்தியாவின் தோழனாக நீடிப்பது என நான் சபதம் ஏற்றுகொண்டேன் எனவும் அந்த கட்டுரையில் ஷின்ஸோ அபே குறிப்பிட்டுள்ளார்.

You might also like

Leave A Reply

Your email address will not be published.

1 × 2 =

*