;
Athirady Tamil News

நுவரெலியா மாவட்ட அபிவிருத்தி இணைப்புக் குழு கூட்டத்திலிருந்து இ.தொ.கா வெளிநடப்பு!! (படங்கள்)

0

நுவரெலியாவில் 13.02.2020 அன்று நடைபெற்ற மாவட்ட அபிவிருத்தி இணைப்புக் குழு கூட்டத்திலிருந்து இ.தொ.கா வெளிநடப்பு செய்துள்ளனர்.

13.02.2020 அன்று நுவரெலியா மாவட்டத்திற்கான அபிவிருத்தி இனைப்புக்குழு கூட்டம் நுவரெலியா மாவட்ட செயலகத்தில் இணைப்புக்குழு தலைவரும் நுவரெலியா மாவட்ட பாராளுமன்ற உறுப்பினருமான முத்து சிவலிங்கம் தலைமையில் நடைபெற்றது.

இக் கூட்டத்தில் இராஜாங்க அமைச்சர் எஸ்.பி. திசாநாயக்க நுவரெலியா மாவட்ட பாராளுமன்ற உறுப்பினர் கலாநிதி வே.இராதாகிருஸ்ணன் உட்பட உள்ளுராட்சி சபைகளின் தலைவர்கள், அரச மற்றும் அரச திணைக்களங்களின் அதிகாரிகள் பொலிஸ் அதிகாரிகள், அரச உத்தியோகஸ்த்தர்கள் கலந்து கொண்டார்கள்.

இந்த கூட்டத்தில் நுவரெலியா பிரதேச சபையின் தலைவர் வி.யோகராஜன் மற்றும் இராஜாங்க அமைச்சர் எஸ்.பி. திசாநாயக்கவிற்கும் இடையில் ஏற்பட்ட வாதபிரதிவாதத்தின் பொழுது தன் மீது தகாத வார்த்தை பிரயோகம் செய்தார் என்ற காரணத்தால் நுவரெலியா பிரதேச சபையின் தலைவர் வேலுயோகராஜ் சபையில் இருந்து வெளிநடப்பு செய்வதாக கூறியதை தொடர்ந்து ஏனைய இ.தொ.காவில் அங்கம் வகித்த அனைத்து உள்ளுராட்சி சபைகளின் தலைவர்களான அக்கரபத்தனை பிரதேச சபையின் தலைவர் கதிர்செல்வன், கொட்டகலை பிரதேச சபையின் தலைவர் ராஜமணி பிரசாந், அட்டன் டிக்கோயா நகரசபையின் தலைவர் பாலசந்திரன், மஸ்கெலியா பிரதேச சபையின் தலைவி திருமதி. சென்பகவள்ளி, நோர்வூட் பிரதேச சபையின் தலைவர் குழந்தைவேல் ரவி உட்பட அங்கத்தினரும் வெளிநடப்பு செய்துள்ளனர்.

அம்பேவெல பகுதியில் தமிழ் குடும்பம் ஒன்றை குறித்த அரச இடம் ஒன்றில் இருந்து வெளியேற்ற வேண்டும் என்ற கோரிக்கையை முன்வைத்த இராஜாங்க அமைச்சர் எஸ்.பி.திசாநாயக்க அதற்கு எதிர்ப்பு தெரிவித்த காரணத்தினாலேயே இந்த வாக்குவாதம் இடம்பெற்றமை குறிப்பிடத்தக்கது.

தொடர்ந்து இராஜாங்க அமைச்சர் எஸ்.பி. திசாநாயக்க அவர்கள் கட்சி சார்பாக நடாத்தும் எந்த ஒரு நிகழ்வுக்கும் கலந்துக் கொள்ள போவதில்லை என்ற முடிவு எடுக்கப்பட்டுள்ளதாகவும் நுவரெலியா பிரதேச சபையின் தலைவர் வேலு யோகராஜ் ஊடகங்களுக்கு தெரிவித்தார்.

இவ்வாறான நிலையில் கூட்டத்தை கொண்டு நடாத்த முடியாத நிலையில் இணைப்புக்குழு தலைவரும் நுவரெலியா மாவட்ட பாராளுமன்ற உறுப்பினருமான முத்து சிவலிங்கம் கூட்டத்தை ஒத்தி வைப்பதாக அறிவித்தார்.

இதே வேளை கூட்டம் நிறைவடைந்து மேடையில் இருந்து கீழே இறங்கி வந்த இராஜாங்க அமைச்சர் எஸ்.பி.திசாநாயக்க தன்னுடைய வார்த்தை பிரயோகம் பிழைத்துவிட்டதாகவும் எனவே அதற்கு தான் மன்னிப்பு கோருவதாகவும் தெரிவித்ததை காண முடிந்ததது.
“அதிரடி” இணையத்துக்காக மலையகத்தில் இருந்து “மலையூரான்”

You might also like

Leave A Reply

Your email address will not be published.

5 + 17 =

*