;
Athirady Tamil News

பல்சுவைக்” குறுஞ்செய்திகளின் தொகுப்பு… “செய்தித் துணுக்குகள்” பகுதி-3.!! (28.04.2018)

0

காணாமல் போனோரின் உறவினர்களுடனான கலந்துரையாடல் அடுத்த வாரம் ஆரம்பம்

வடக்கு மற்றும் கிழக்கு மாகாணங்களில் காணாமல் போனோரின் உறவினர்களுடன் அடுத்த வாரம் முதல் கலந்துரையாடல்களை ஆரம்பிக்க எதிர்பார்ப்பதாக காணாமல் போனோர் தொடர்பான அலுவலகம் அறிவித்துள்ளது.

காணாமல் போனவர்கள் தொடர்பிலான தகவல்களை அவர்களிடமிருந்து பெறவும், அவர்கள் அரசாங்கத்திலிருந்து எதிர்பார்ப்பவை தொடர்பில் கலந்துரையாடவும் எதிர்பார்ப்பதாக காணாமல் போனோர் தொடர்பான அலுவலகத்தின் தலைவர் ஜனாதிபதி சட்டத்தரணி சாலிய பீரிஸ் தெரிவித்துள்ளார்.

காணாமல் போனோர் தொடர்பான அலுவலகத்தின் நடவடிக்கைகளைத் ஆரம்பிப்பதற்கு தேவையான நிர்வாக அதிகாரிகளை சேர்ப்பதற்கான விண்ணப்பங்களை கோரல் நேற்றுடன் முடிவடைந்துள்ளது.

அடுத்த மாத இறுதியில் குறித்த அதிகாரிகளை ஆட்சேர்ப்பு செய்த பின்னர் காணாமல் போனோர் தொடர்பான அலுவலகத்தின் நடவடிக்கைகளை ஆரம்பிப்பதாகவும் ஜனாதிபதி சட்டத்தரணி சாலிய பீரிஸ் தெரிவித்துள்ளார்.

அத்துடன் அலுவலகத்திற்கு தேவையான விசாரணை அதிகாரிகளை நியமிப்பது தொடர்பான விண்ணப்பங்கள் எதிர்வரும் தினங்களில் கோரப்பட உள்ளதாகவும் தெரிவிக்கப்படுகின்றது.

அடுத்த 09 மணி நேரத்திற்குள் இடியுடன்கூடிய மழை பெய்யலாம்

அடுத்து வரும் 09 மணி நேரத்திற்குள் நாட்டில் பெரும்பாலான பிரதேசங்களில் இடியுடன்கூடிய மழை பெய்வதற்கான சாத்தியம் அதிகமாக காணப்படுவதாக அனர்த்த முகாமைத்துவ நிலையம் தெரிவித்துள்ளது.

மேல், சப்ரகமுவ, மத்திய, வடமேல் மற்றும் ஊவா மாகாணங்களிலும், காலி, மாத்தறை, வவுனியா மற்றும் மன்னார் ஆகிய மாவட்டங்களிலும் இவ்வாறு இடியுடன்கூடிய மழை பெய்யலாம் என்று முனனெச்சரிக்கை விடுக்கப்பட்டுள்ளது.

கட்சித் தலைவர் பதவிக்காக எவரும் முன்வரவில்லை

ஐக்கிய தேசிய கட்சியின் தலைவர் பதவிக்கு போட்டியிடுவதற்கான எண்ணம் வேறு எவரிடத்திலும் இருக்கவில்லை என்று அந்தக் கட்சியின் செயலாளராக நியமிக்கப்பட்டுள்ள அமைச்சர் அகிலவிராஜ் காரியவசம் கூறியுள்ளார்.

கட்சியின் பாராளுமன்ற உறுப்பினர்கள் மற்றும் மத்திய செயற்குழு உறுப்பினர்களை அழைத்து தலைமை பதவியில் நிற்பதற்கு யாராவது விருப்பமா என்று கட்சியின் தலைவரான ரணில் விக்ரமசிங்க கேட்டிருந்ததாகவும் அகிலவிராஜ் காரியவசம் கூறியுள்ளார்.

ஐக்கிய தேசிய கட்சியின் செயலாளராக நியமிக்கப்பட்ட பின்னர் அமைச்சர் அகிலவிராஜ் காரியவசம் இன்று மகாநாயக்க தேரர்களை சந்தித்து ஆசி பெற்றுக் கொண்ட பின்னர் ஊடகங்களிடம் பேசும் போது இவ்வாறு கூறினார்.

எதிர்காலத்தில் முன்னெடுக்க எதிர்பார்த்துள்ள திட்டங்களுக்கு மகாநாயக்க தேரர்களிடம் அவர் ஆசி பெற்றுக் கொண்ட பின்னர் தலதா மாளிகைக்கு சென்ற அமைச்சர் அகிலவிராஜ் காரியவசம் வணக்க வழிபாடுகளில் ஈடுபட்டார்.

12 அடி நீளமான பாம்பு மீட்பு

புத்தளம் முந்தல் பிரதேசத்தில் 12 அடி நீளமான பாம்பு ஒன்று கடற்ரையிலிருந்து பொதுமக்களால் பிடிக்கப்பட்டு புத்தளம் பொலிஸாருக்கு தகவல் தெரிவித்த நிலையில், வனசீவராசிகள் சரணாலயத்திடம் ஒப்படைக்கப்பட்டுள்ளது.

நேற்றிரவு ஒன்பது மணியளவில் முந்தல் பிரதேசத்தில் கிராம வாசிகளால் குறித்த பாம்பு மீட்கப்பட்டு, புத்தளம் பொலிஸாருக்கு தகவல் விடுத்த நிலையில், குறித்த பாம்பு வனசீவராசிகள் திணைக்களத்தால் சரணாலயத்திற்கு வழங்கப்பட்டுள்ளது.

You might also like

Leave A Reply

Your email address will not be published.

one + 13 =

*