சுவீடன் மற்றும் பெல்ஜியத்தில் Freezer கட்டமைப்புகள் மீது சைபர் தாக்குதல்

சுவீடன் மற்றும் பெல்ஜியத்தில் உள்ள பல்பொருள் அங்காடிகளின் குளிரூட்டும் மற்றும் உறைநிலைப் பாதுகாப்பு (Freezer) கட்டமைப்புகள் மீது இரவு நேரத்தில் சைபர் தாக்குதல் நடத்தப்பட்டுள்ளது.

இதன் காரணமாக குளிரூட்டும் சாதனங்களின் வெப்பநிலை 50 பாகை செல்சியஸ் வரை உயர்ந்துள்ளதுடன், பல மில்லியன் யூரோக்கள் பெறுமதியான உணவுப் பொருட்கள் பழுதடைந்து அழிந்துள்ளதாகத் தெரிவிக்கப்படுகிறது.

 பல்பொருள் அங்காடிகள் மீது நடத்தப்பட்ட சைபர் தாக்குதல்

சுவீடனின் மிகப்பெரிய பல்பொருள் அங்காடித் தொடர்களில் ஒன்றான ICA நிறுவனம் இந்தத் தாக்குதலால் பெரும் பாதிப்பைச் சந்தித்துள்ளது.

கடந்த ஒக்டோபர் மாதம் பிரான்ஸில் நூற்றுக்கணக்கான பல்பொருள் அங்காடிகள் மீது நடத்தப்பட்ட சைபர் தாக்குதல்களுடன் இந்தச் சம்பவம் குறிப்பிடத்தக்க ஒற்றுமைகளைக் கொண்டுள்ளதாகக் கூறப்படுகிறது.

அப்போது குளிரூட்டும் கட்டமைப்புகள் தொலைவிலிருந்து ஊடுருவி கட்டுப்படுத்தப்பட்டதாகத் தெரிவிக்கப்பட்டது. பிரான்ஸில் நடத்தப்பட்ட தாக்குதல்களில் Danfoss நிறுவனத்தின் குளிரூட்டல் கட்டுப்பாட்டுக் கருவிகள் பயன்படுத்தப்பட்டதாகத் தகவல்கள் வெளியாகியிருந்தன.

எனினும், சுவீடனில் பாதிக்கப்பட்ட அங்காடிகளிலும் அதே வகையான கருவிகள் பயன்படுத்தப்பட்டனவா என்பது இதுவரை உறுதிப்படுத்தப்படவில்லை. இந்தச் சம்பவங்களுக்கிடையில் நேரடித் தொடர்பு இருப்பதற்கான எந்தவொரு உறுதிப்படுத்தப்பட்ட ஆதாரமும் இதுவரை கிடைக்கவில்லை.

தாக்குதல்களை நடத்தியவர்கள் யார் என்பதும் அடையாளம் காணப்படவில்லை. அண்மைக் காலங்களில் பிரான்ஸின் பல்பொருள் அங்காடிகள் மற்றும் அமெரிக்க இராணுவத் தளங்களிலும் குளிரூட்டும் மற்றும் உறைநிலைப் பாதுகாப்புக் கட்டமைப்புகளை இலக்குவைத்து இதேபோன்ற இணைய ஊடுருவல் தாக்குதல்கள் இடம்பெற்றுள்ளன.

இவ்வாறான சைபர் தாக்குதல்கள் பல நாடுகளின் உணவுப் பாதுகாப்புக்கு அச்சுறுத்தலாக அமையக்கூடும் என இணையப் பாதுகாப்பு நிபுணர்கள் எச்சரிக்கை விடுத்துள்ளனர்.