அதிக விலைக்கு குடிநீர் விற்பனை ; பம்பலப்பிட்டி உணவகத்திற்கு ஒரு இலட்சம் அபராதம்!

அதிகபட்ச சில்லறை விலையை விட அதிக விலைக்கு போத்தல் குடிநீரை விற்பனை செய்த பம்பலப்பிட்டி பகுதியிலுள்ள உணவகமொன்றுக்கு கொழும்பு பிரதான நீதவான் நீதிமன்றம் ஒரு இலட்சம் ரூபாய் அபராதம் விதித்துள்ளது.

கொழும்பு 04, காலி வீதியில் அமைந்துள்ள குறித்த உணவகத்திற்கு எதிராக நுகர்வோர் விவகார அதிகார சபையினால் தாக்கல் செய்யப்பட்ட வழக்கில், குற்றச்சாட்டை உணவக நிர்வாகம் ஏற்றுக்கொண்டதைத் தொடர்ந்து இந்த அபராதம் விதிக்கப்பட்டுள்ளது.

அதிகபட்ச சில்லறை விலை 80 ரூபாய்

2492/29 என்ற விசேட வர்த்தமானி அறிவித்தலின் 96ஆம் கட்டளையின்படி, 500 முதல் 999 மில்லிலீற்றர் வரையான போத்தல் குடிநீரின் அதிகபட்ச சில்லறை விலை 80 ரூபாய் என நிர்ணயிக்கப்பட்டுள்ளது.

எனினும், குறித்த உணவகத்தில் 500 மில்லிலீற்றர் போத்தல் குடிநீர் 100 ரூபாய்க்கு விற்பனை செய்யப்பட்டதாக நுகர்வோர் விவகார அதிகார சபை நீதிமன்றத்தில் தெரிவித்துள்ளது.

அதிகபட்ச சில்லறை விலை நிர்ணயிக்கப்பட்டுள்ள போத்தல் குடிநீரை உணவகங்கள் மற்றும் உணவகங்கள் உள்ளிட்ட எந்தவொரு வர்த்தக நிலையத்திலும் நிர்ணயிக்கப்பட்ட விலையை விட அதிகமாக விற்பனை செய்ய முடியாது என அதிகார சபை தெரிவித்துள்ளது.