நீதிமன்ற கட்டளையையடுத்து நெடுந்தூர பேருந்து நிலையம் இயங்கத் தொடங்கியது

வடக்கு மாகாண ஆளுநர் நா. வேதநாயகன், நாடாளுமன்ற உறுப்பினர் இளங்குமரன் மற்றும் உள்ளூராட்சி ஆணையாளர் சுதர்சன் உள்ளிட்டோர் கலந்துகொண்டு சேவைகளை ஆரம்பித்து வைத்தனர்.

சுமார் 134 மில்லியன் ரூபா செலவில் அமைக்கப்பட்டு, நீண்டகாலமாகப் பயன்பாடின்றிக் காணப்பட்ட இந்தப் பேருந்து நிலையத்தைச் செயல்படுத்துவதற்குப் பல்வேறு முயற்சிகள் முன்னெடுக்கப்பட்ட போதிலும், அவை வெற்றியளிக்கவில்லை.

பேருந்து நிலையத்தைச் செயல்படுத்துவது தொடர்பில் வட இலங்கை தனியார் பேருந்து சங்கத்தால் வடக்கு மாகாண வீதிப் பயணிகள் போக்குவரத்து அதிகார சபைக்கு எதிராக வழக்குத் தொடரப்பட்டிருந்தது.

இந்நிலையில், நீதிமன்றத்தின் கட்டளைக்கு அமைவாக இணைந்த நேர அட்டவணையின் கீழ் பேருந்து சேவைகளை முன்னெடுப்பதற்கான நடவடிக்கைகள் மேற்கொள்ளப்பட்டுள்ளன.

அதேவேளை வடக்கு மாகாண வீதிப் பயணிகள் போக்குவரத்து அதிகார சபையின் பொறுப்பின் கீழ் இந்த இணைந்த சேவை முன்னெடுக்கப்படும் நிலையில், இலங்கை போக்குவரத்துச் சபையின் பேருந்துகள் இச்சேவையில் இணைக்கப்படவில்லை என்பது குறிப்பிடத்தக்கது.