பேரிடரால் பாதிக்கப்பட்ட குடும்பங்களுக்கு விகாரை நிலத்தை நன்கொடையாக வழங்கிய விகாராதிபதி

மத்தேகெட்டிய கோகரெல்ல சங்கமு ரஜமஹா விஹாரையின் விகாராதிபதி அளுத்கம மங்கள தேரர், அண்மைய இயற்கை பாதிப்புகளால் இடம்பெயர்ந்து வாழும் குடும்பங்களின் மீள்குடியேற்றத் திட்டத்திற்காக 20 ஏக்கர் பரப்பளவிலான விஹாரை நிலத்தை பெருந்தன்மையுடன் நன்கொடையாக வழங்கியுள்ளார்.

இந்த நிலம் பேரிடரால் பாதிக்கப்பட்டவர்களுக்கு புதிய வீடுகள் அமைக்கவும், நீடித்த குடியிருப்பு வசதிகளை உருவாக்கவும் அரசாங்கம் மேற்கொள்ளும் திட்டங்களுக்கு முக்கிய பங்காற்றும் வகையில் வழங்கப்பட்டுள்ளது.

விகாராதிபதி வழங்கிய நில நன்கொடைக்கான அதிகாரப்பூர்வ ஆவணங்கள் இன்று ஜனாதிபதி அநுர குமார திசாநாயக்கவிடம் முறையாக ஒப்படைக்கப்பட்டன.

இதன் மூலம் மீள்குடியேற்றப் பணிகள் விரைவில் முன்னெடுக்கப்படும் என எதிர்பார்க்கப்படுகிறது.

இந்த நன்கொடையால், தங்களது வீடுகளை இழந்த பல குடும்பங்கள் பாதுகாப்பான, ஒழுங்கமைக்கப்பட்ட மற்றும் நீடித்த குடியிருப்பைப் பெறுவதற்கான வாய்ப்பு கிடைக்கும் என்று அதிகாரிகள் தெரிவித்துள்ளனர்.