வடமராட்சி கிழக்கில் புற்தரைக்கு தீ வைத்த விஷமிகள் – போக்குவரத்து பாதிப்பு
யாழ்ப்பாணம் , வடமராட்சி கிழக்கு வலிக்கண்டி பகுதியில் வீதியோர சம்பு புற்களுக்கு விஷமிகள் தீ வைத்தமையால் , சில மணி நேர போக்குவரத்து பாதிக்கப்பட்டு இருந்தது.
பருத்தித்துறை – மருதங்கேணி பிரதான வீதியில் வலிக்கண்டி பகுதியில் வீதியோரமாக காணப்பட்ட சம்பு புற்களுக்கு விஷமிகள் நேற்றைய தினம் செவ்வாய்க்கிழமை மாலை தீ வைத்துள்ளனர்.
கடும் காற்று வீசி வரும் நிலையில் , வீதியோர புற்கள் தவிர்ந்து அருகில் வெளிகளில் காணப்பட்ட புற்தரைகளுக்கு தீ பரவியதால் , பெருமளவான புகை மூட்டம் எழுந்து வீதியூடாக போக்குவரத்து செய்ய முடியாத நிலைமை ஏற்பட்டது.
பருத்தித்துறை பிரதேச சபையின் தண்ணீர் பவுசர் அழைக்கப்பட்டு தீ கட்டுக்குள் கொண்டுவரப்பட்ட பின்னரே வீதியின் ஊடாக பொது மக்கள் போக்குவரத்து செய்ய கூடிய நிலைமை ஏற்பட்டது.
