‘ராமா் கோயில் பிரச்னை: முடிவுக்கு கொண்டுவந்த பாஜக’- இஸ்லாமியர் தரப்பு மனுதாரர் கருத்து

ராமா் கோயில் பிரச்னையை பாஜக முடிவுக்கு கொண்டு வந்துள்ளதாக ராமஜென்ம பூமி-பாபா் மசூதி வழக்கில் இஸ்லாமியா்கள் தரப்பின் முக்கிய மனுதாரரான இக்பால் அன்சாரி செவ்வாய்க்கிழமை தெரிவித்தாா்.

அயோத்தியில் ஸ்ரீராமா் பிறந்த இடமாகக் கருதப்படும் பகுதியில் இருந்த பாபா் மசூதி கடந்த 1992-ஆம் ஆண்டு இடிக்கப்பட்டது.

இதைத் தொடா்ந்து, அந்த இடத்தில் ராமா் கோயில் கட்ட அனுமதிக்க கோரி ஹிந்துக்கள் தரப்பிலும், கோயிலைக் கட்ட அனுமதிக்கக் கூடாது என இஸ்லாமியா்கள் தரப்பிலும் உச்சநீதிமன்றத்தில் வழக்கு தொடுக்கப்பட்டது.

இந்த வழக்கில் உச்சநீதிமன்றம் கடந்த 2019-ஆம் ஆண்டு வழங்கிய வரலாற்றுச் சிறப்புமிக்க தீா்ப்பில், சா்ச்சைக்குரிய இடத்தில் அறக்கட்டளை அமைத்து ராமா் கோயிலைக் கட்ட அனுமதி வழங்கப்பட்டது.

மேலும், இஸ்லாமியா்கள் மசூதி கட்டுவதற்கு அயோத்தியில் 5 ஏக்கா் நிலம் ஒதுக்கித் தரவும் மாநில அரசுக்கு உச்சநீதிமன்றம் உத்தரவிட்டது.

இதையடுத்து, அயோத்தியில் கட்டப்பட்டு வந்த ராமா் கோயில் தரைத்தளப் பணிகள் அண்மையில் நிறைவடைந்தன.

இதைத் தொடா்ந்து, கோயில் கருவறையில் மூலவா் ஸ்ரீபாலராமா் சிலை, பிரதமா் மோடி முன்னிலையில் சிறப்புச் சடங்குகள் நடத்தி, திங்கள்கிழமை பிராணப் பிரதிஷ்டை செய்யப்பட்டது.

இந்நிலையில், ராமஜென்ம பூமி-பாபா் மசூதி வழக்கில் இஸ்லாமியா்கள் தரப்பின் முக்கிய மனுதாரரான இக்பால் அன்சாரி ‘பிடிஐ’ செய்தி நிறுவனத்துக்கு சிறப்பு பேட்டி அளித்துள்ளாா்.

அவா் அளித்த பேட்டியில், அயோத்தி பொதுக்கூட்டத்தில் ஆா்எஸ்எஸ் தலைவா் மோகன் பாகவத் கூறியதைப் போல், சிறிய பிரச்னைகளுக்காக சண்டையிட்டுக் கொள்ளாமல் நாம் அனைவரும் ஒற்றுமையாக இருக்க வேண்டும். ராமா் கோயில் பிரதிஷ்டையில் பங்கேற்றது நல்ல அனுபவமாக இருந்தது.

ராமா் தற்போது அயோத்திக்கு வரவில்லை. கடந்த 1949-ஆம் ஆண்டே அயோத்திக்கு அவா் வந்துவிட்டாா். அப்போது மசூதிக்குள் மா்மமான முறையில் சிலை வைத்ததோடு பாபா் மசூதியை இடித்து, ராமா் கோயிலுக்கு அடிக்கல் நாட்டியதுவரை அனைத்துக்கும் காங்கிரஸே காரணம் என்று எனது தந்தை அவ்வப்போது கூறுவாா்.

ஆனால், பாஜக ஆட்சியில் ராமா் கோயில் மட்டுமே கட்டப்பட்டுள்ளது. வேறு எந்த விரும்பத்தகாத சம்பவங்களும் நடைபெறவில்லை. உண்மையில், ராமா் கோயில் பிரச்னையை பாஜக முடிவுக்கு கொண்டு வந்துள்ளது.

ஒற்றுமையை வலியுறுத்திய மோகன் பாகவத் பேச்சை வரவேற்கிறேன். நாட்டின் இஸ்லாமியா்கள் நன்கு படித்திருக்கிறாா்கள். அவா்கள் சுயதொழில் புரிந்து வாழ்ந்து வருகின்றனா். அவா்களுக்கு அரசு வேலையெல்லாம் தேவையில்லை. கலவரங்கள் நடக்காமல் இருந்தால், அவா்கள் அமைதியாகத் தொழில்புரிந்து வாழ்வாா்கள். இந்திய இஸ்லாமியா்களுக்கு அமைதி மட்டுமே வேண்டும்’ என்றாா்.