இலங்கைத் தொழிலாளர்களைப் பணியமர்த்தும் திட்டத்திற்கு தாய்லாந்து ஒப்புதல்

தொழிலாளர் பற்றாக்குறையைச் சமாளிக்கும் பொருட்டு இலங்கையிலிருந்து 10,000 தொழிலாளர்களை முதற்கட்டமாக நியமிக்கும் திட்டங்களுக்கு தாய்லாந்து ஒப்புதல் அளித்துள்ளது.

இந்த ஆண்டின் தொடக்கத்தில் கையெழுத்திடப்பட்ட இருதரப்பு தொழிலாளர் ஒப்பந்தத்தைத் தொடர்ந்து, இந்த நடவடிக்கை மேற்கொள்ளப்பட்டுள்ளது.

இதன்படி இரு நாடுகளுக்கும் இடையே ஏற்கனவே உள்ள புரிந்துணர்வு ஒப்பந்தத்தின் கீழ் இலங்கைத் தொழிலாளர்களை நியமிப்பதற்கு வெளிநாட்டுத் தொழிலாளர் மேலாண்மைக் கொள்கைக் குழு ஒப்புதல் அளித்துள்ளதாக தெரிவிக்கப்படுகிறது.

தொழிலாளர் பற்றாக்குறையால் ஏற்படும் இடையூறு
பல்வேறு துறைகளில் உள்ள வணிகங்கள் தொடர்ந்து பணியாளர் பற்றாக்குறையை சந்தித்து வருவதால், தாய்லாந்து முதலாளிகளுக்கு புலம்பெயர் தொழிலாளர்களின் கூடுதல் ஆதாரத்தை வழங்குவதே இந்த நடவடிக்கையின் நோக்கமாகும்.

தொழிலாளர் பற்றாக்குறையால் ஏற்படும் இடையூறுகளின்றி வணிகங்கள் தங்கள் செயல்பாடுகளைத் தொடர முடியும் என்பதை உறுதி செய்வதற்காக, ஆட்சேர்ப்பு வாய்ப்புகளை விரிவுபடுத்த தாய்லாந்து அரசாங்கம் முயன்று வருவதாக தெரிவிக்கப்படுகிறது.

கூடுதல் தொழிலாளர் ஆதாரமாக அடையாளம் காணப்பட்ட முதல் நாடுகளில் இலங்கையும் ஒன்றாகும். இதன் ஆரம்பகட்ட ஆட்சேர்ப்பு இலக்கு 10,000 பேர் ஆகும்.

தாய்லாந்துக்கும் இலங்கைக்கும் இடையிலான தொழிலாளர் ஒத்துழைப்பு குறித்த புரிந்துணர்வு ஒப்பந்தத்திற்கும், தாய்லாந்தில் இலங்கைத் தொழிலாளர்களின் வேலைவாய்ப்பை நிர்வகிக்கும் ஒப்பந்தத்திற்கும் செப்டம்பர் 8 ஆம் திகதி அமைச்சரவை ஒப்புதல் அளித்ததைத் தொடர்ந்து இந்த முடிவு எடுக்கப்பட்டுள்ளது.