போர்நிறுத்தத்திற்கு மத்தியில்… லெபனானில் தாக்குதலைத் தீவிரப்படுத்தும் இஸ்ரேல்

ஞாயிற்றுக்கிழமையன்று நாட்டின் மீது இஸ்ரேல் நடத்திய தாக்குதல்களில், இரண்டு குழந்தைகள் மற்றும் இரண்டு பெண்கள் உட்பட 14 பேர் மரணமடைந்ததாக லெபனான் சுகாதார அமைச்சகம் தெரிவித்துள்ளது.

வெளியேற்ற எச்சரிக்கை
இஸ்ரேல் நடத்தியுள்ள தாக்குதலில் சிக்கி 37 பேர்கள் காயமடைந்துள்ளதாகவும் தெரிவிக்கப்பட்டுள்ளது. தெற்கு லெபனானில் உள்ள பல கிராமங்களுக்கு வெளியேற்ற எச்சரிக்கைகளை இஸ்ரேல் இராணுவத்தின் செய்தித் தொடர்பாளர் முன்னதாகவே விடுத்திருந்தார்.

தெற்கு லெபனானில் உள்ள ஹிஸ்புல்லா இயக்கத்தினரையும், இஸ்ரேலிய பாதுகாப்புப் படை (IDF) வீரர்களுக்கு எதிரான தாக்குதல்களை முன்னெடுக்கப் பயன்படுத்தப்பட்டதாகக் கூறப்படும் இடங்களையும் மட்டுமே IDF குறிவைப்பதாக இஸ்ரேல் தெரிவித்துள்ளது.

லெபனானில் ஹிஸ்புல்லா படைகள் முன்னெடுத்த ட்ரோன் தாக்குதலில் 19 வயது இஸ்ரேலிய பாதுகாப்புப் படை வீரர் ஒருவர் கொல்லப்பட்டதாகவும், மேலும் ஆறு பேர் காயமடைந்ததாகவும் அது தெரிவித்துள்ளது.

இரு நாடுகளும், ஏப்ரல் 16 அன்று அமுலுக்கு வந்து, இரண்டு நாட்களுக்கு முன்பு மேலும் மூன்று வாரங்களுக்கு நீட்டிக்கப்பட்ட, ஒரு தற்காலிகப் போர் நிறுத்தத்தின் கீழ் நீடிக்கின்றன.

போர் நிறுத்தத்தைச் சிதைத்து
இந்த ஒப்பந்தத்தின்படி, திட்டமிடப்பட்ட, உடனடியான அல்லது நடந்துகொண்டிருக்கும் தாக்குதல்களுக்கு எதிராக, எந்த நேரத்திலும், தற்காப்புக்காகத் தேவையான அனைத்து நடவடிக்கைகளையும் எடுக்கும் தனது உரிமையை இஸ்ரேல் தக்கவைத்துக் கொள்கிறது.

மேலும், அரசாங்கக் கூட்டம் ஒன்றில் உரையாற்றிய இஸ்ரேலியப் பிரதமர் பெஞ்சமின் நெதன்யாகு, இஸ்ரேலியப் பாதுகாப்புப் படை லெபனானில் தீவிரமாகச் செயல்பட்டு வருவதாகவும், ஹிஸ்புல்லாவின் நடவடிக்கைகள் போர் நிறுத்தத்தைச் சிதைத்து வருவதாகவும் கூறினார்.

போர் நிறுத்தம் அமுலுக்கு வந்ததிலிருந்து, இஸ்ரேலும் ஹிஸ்புல்லாவும் ஒப்பந்தத்தை மீறியதாகப் பரஸ்பரம் குற்றம் சாட்டி, ஒருவர் மீது ஒருவர் தாக்குதல் நடத்தியதாகத் தெரிவித்துள்ளன.

சனிக்கிழமையன்று, லெபனானில் உள்ள ஹிஸ்புல்லாவின் இலக்குகளைத் தீவிரமாகத் தாக்குமாறு இஸ்ரேலிய இராணுவத்திற்கு நெதன்யாகு உத்தரவிட்டார். தெற்கு லெபனானில் அதே நாளில் நடந்த தாக்குதல்களில் குறைந்தது ஆறு பேர் கொல்லப்பட்டனர்.