உக்ரைன் ஜனாதிபதி கனடாவிற்கு அதிகாரப்பூர்வ விஜயம்

உக்ரைன் ஜனாதிபதி வோலோடிமிர் ஸெலென்ஸ்கி, கனடிய பிரதமர் மார்க் கார்னியைச் சந்திப்பதற்காக புதன்கிழமை இரவு கனடாவின் கல்கரி நகரத்தை வந்தடைந்தார்.

வியாழக்கிழமை காலையில் பிரதமர் மார்க் கார்னியைச் சந்திக்கும் ஸெலென்ஸ்கி, பின்னர் அருகிலுள்ள பேன்ஃப் நகரில் நடைபெறும் கனடிய அமைச்சரவைக் கூட்டத்திலும் உரையாற்றவுள்ளார். அவருடன் அவரது மனைவி ஒலேனா ஸெலென்ஸ்காவும் வருகை தந்துள்ளார்.

இவர்கள் வெள்ளிக்கிழமை வரை கனடாவில் தங்கியிருந்து ரொறன்ரோ மற்றும் நோர்த் பே ஆகிய பகுதிகளுக்கும் செல்லவுள்ளனர்.

பாதுகாப்பு, பொருளாதாரம் மற்றும் எரிசக்தித் துறைகளில் இரு நாடுகளுக்கு இடையிலான ஒத்துழைப்பை மேலும் வலுப்படுத்துவதே இந்த விஜயத்தின் முக்கிய நோக்கமாகும்.

ரஷ்யாவின் ஆக்கிரமிப்புப் போரினால் உக்ரைன் சந்திக்கும் மனித இழப்புகள் குறித்தும், இரு நாட்டு மக்களுக்கு இடையிலான உறவை வலுப்படுத்துவது குறித்தும் விவாதிக்கப்படும் என பிரதமர் மார்க் கார்னி தெரிவித்துள்ளார்.

2022 முதல் 2029 வரையிலான காலப்பகுதியில் உக்ரைனின் பாதுகாப்பிற்காக கனடா 6.5 பில்லியன் டாலர்களை ராணுவ உதவியாக வழங்க உறுதியளித்துள்ளது.

உலகளவில் உக்ரைனுக்கு அதிக நிதி மற்றும் ராணுவ உதவி வழங்கும் நாடுகளில் கனடா 4-வது இடத்தில் உள்ளமை குறிப்பிடத்தக்கது. ரஷ்யாவின் வான்வழித் தாக்குதல்களைச் சமாளிக்க உக்ரைன் கூடுதல் வான் பாதுகாப்பு உதவிகளைக் கோரி வருகிறது.

அதேவேளை, உக்ரைனில் இராணுவச் சட்டத்தின் காரணமாக தேர்தல்கள் நடத்த முடியாத சூழலில், ஊழல் குற்றச்சாட்டுகள் மற்றும் ஜூலை மாதம் பாதுகாப்பு அமைச்சர், ராணுவத் தளபதி பணிநீக்கம் போன்ற உள்நாட்டு அரசியல் அழுத்தங்களையும் ஸெலென்ஸ்கி எதிர்கொண்டு வருகிறார்.

ரஷ்யாவினால் கடத்தப்பட்ட உக்ரைனிய குழந்தைகள் மற்றும் போர்க் கைதிகளை மீட்பது தொடர்பான சர்வதேச மாநாடு ஒன்றை கனடாவின் வெளியுறவுத்துறை அமைச்சர் அனிதா ஆனந்த் இந்த மாத இறுதியில் ரொறன்ரோவில் இணைந்து நடத்தவுள்ளார்.