கடத்தல்கார பலூன்கள்; லித்துவேனிய அரசாங்கம் அவசரகால நிலை அறிவிப்பு!

பெலாரஸில் இருந்து வரும் கடத்தல்கார பலூன்கள் விமானப் போக்குவரத்துக்கு இடையூறு ஏற்படுத்துவதாக , லித்துவேனிய அரசாங்கம் இன்று (9) அவசரகால நிலையை அறிவித்துள்ளது.

அதோடு, காவல்துறை மற்றும் எல்லைக் காவல்படையினருடன் இணைந்து இராணுவம் செயல்பட அனுமதிக்குமாறு நாடாளுமன்றத்திடம் கோரிக்கை விடுக்கப்பட்டுள்ளதாக வெளிநாட்டு ஊடகங்கள் செய்தி வெளியிட்டுள்ளன.

சிகரெட்டுகளைக் கடத்துவதற்காக பலூன்கள்
காலநிலை பலூன்கள் காரணமாக வில்னியஸ் விமான நிலையம் மீண்டும் மீண்டும் மூடப்பட்டுள்ளது.

பலூன்கள் சிகரெட்டுகளைக் கடத்துவதற்காக அனுப்பப்படுகின்றன என்றும், ரஷ்யாவின் நெருங்கிய நட்பு நாடான பெலாரஸால் நிகழ்த்தப்படும் “கலப்பினத் தாக்குதல்” இது என்றும் லித்துவேனியா கூறுகிறது.

இந்த அவசரகால நிலை, சிவில் விமானப் போக்குவரத்து இடையூறுகள் காரணமாக மட்டுமல்லாமல், தேசியப் பாதுகாப்பு நலன்கள் காரணமாகவும் அறிவிக்கப்படுகிறது என, உள்துறை அமைச்சர் விளாடிஸ்லாவ் கொண்ட்ரடோவிச் அரசாங்கக் கூட்டத்தில் தெரிவித்தார்.

எனினும் பெலாரஸ் இந்தப் பலூன்களுக்குப் பொறுப்பேற்க மறுத்துள்ளதுடன், லித்துவேனியா ஒரு ட்ரோனைப் பயன்படுத்தி “தீவிரவாதப் பொருள்களை” வீசியதன் மூலம் ஆத்திரமூட்டலை ஏற்படுத்தியதாகக் குற்றம் சாட்டியுள்ள நிலையில் லித்துவேனியா மறுத்துள்ளது.

அதேசமயம் அவசரகால நிலையின்போது காவல்துறை, எல்லைக் காவல்படை மற்றும் பாதுகாப்பாளர்களுடன் இணைந்து செயல்பட, அத்துடன் தன்னிச்சையாகச் செயல்படவும் இராணுவத்திற்கு அதிகாரம் வழங்க அனுமதிக்குமாறு லித்துவேனிய அரசாங்கம் நாடாளுமன்றத்தைக் கோரியுள்ளதாகவும் தெரிவிக்கப்பட்டுள்ளது.