நாடளாவிய ரீதியில் 125,000 ஆளணி வெற்றிடங்களை நிரப்புவதற்கான நடவடிக்கைகளும் முன்னெடுக்கப்பட்டு வருகிறது பொது நிர்வாக, மாகாண சபைகள் மற்றும் உள்ளூராட்சி அமைச்சர் பேராசிரியர் சந்தன அபயரத்ன தெரிவித்தார்.
வடக்கு மாகாண உள்ளூராட்சி மன்றங்களின் அபிவிருத்தி தொடர்பான விசேட கலந்துரையாடல், வடக்கு மாகாண ஆளுநர் நா.வேதநாயகன் தலைமையில் நேற்றைய தினம் சனிக்கிழமை ஆளுநர் செயலகத்தில் நடைபெற்றது.
அக் கலந்துரையாடலில் கலந்து கொண்டு கருத்து தெரிவிக்கும் போதே அவ்வாறு தெரிவித்தார்.
மேலும் தெரிவிக்கையில்,
அரசாங்கம் பொறுப்பேற்றபோது நாடு முழுவதும் சுமார் 350,000 ஆளணி வெற்றிடங்கள் காணப்பட்டது, அதில் 2025ஆம் ஆண்டு 35,000 பேருக்கு நியமனங்கள் வழங்கப்பட்டுள்ளது
இலங்கை நிருவாக சேவை, இலங்கை திட்டமிடல் சேவை, கணக்காளர் சேவை, பொறியியல் சேவை உள்ளிட்ட அரச சேவைகளுக்கான ஆட்சேர்ப்புகள் ஆரம்பிக்கப்பட்டுள்ளது
அத்துடன் 125,000 ஆளணி வெற்றிடங்களை நிரப்புவதற்கான நடவடிக்கைகளும் முன்னெடுக்கப்பட்டு வருகிறது.
இதேவேளை, திணைக்களத் தலைவர்கள், ஆளுநர், அமைச்சர்கள் மற்றும் அரச நிறுவனங்களிடம் காணப்படும் பல வாகனங்கள் பத்து ஆண்டுகளுக்கும் மேலாகப் பழமையானவை
அவற்றில், சுமார் 2,000 புதிய வாகனங்களில் ஒரு தொகுதியையாவது இவ்வாண்டு இறுதிக்குள் இறக்குமதி செய்து திணைக்களங்களின் பயன்பாட்டுக்கு வழங்குவதற்கான எதிர்பார்ப்பு உள்ளது
மேலும், எதிர்வரும் 14ஆம் திகதி முதல் உள்ளூராட்சி வாரம் ஆரம்பமாகவுள்ள நிலையில், உள்ளூராட்சி மன்றங்கள் தமது சேவைகளை மக்களுக்கு தெளிவாக அறிமுகப்படுத்துவதுடன், மக்களின் தேவைகளை அவர்களைத் தேடிச் சென்று இனங்கண்டு சேவைகளை வழங்க வேண்டும்
இக்கலந்துரையாடலில் கடற்றொழில், அமைச்சர் இ.சந்திரசேகர், வடக்கு மாகாண ஆளுநரின் செயலாளர், வடக்கு மாகாண உள்ளூராட்சி அமைச்சின் செயலாளர், நிர்வாகம் மற்றும் நிதிக்கான பிரதிப் பிரதம செயலாளர்கள், வடக்கு மாகாண உள்ளூராட்சி ஆணையாளர், உள்ளூராட்சி அமைச்சின் திட்டமிடல் பணிப்பாளர், மாநகர சபை ஆணையாளர்கள் மற்றும் உள்ளூராட்சி மன்றங்களின் செயலாளர்கள் உள்ளிட்டோர் கலந்து கொண்டனர்.
