மாற்றத்தை நோக்கிய பயணத்துக்கு 2 வருடங்கள் பூர்த்தி!

எந்தவொரு அரசாங்கத்தி னதும் வெற்றியை இறுதி யில் தீர்மானிப்பது அது அறிவிக்கும் திட்டங்களின் எண்ணிக்கை அல்ல. மாறாக, அந்தத் திட்டங்கள் மக்களின் வாழ்க்கையில் ஏற்படுத்தும் உண்மையான மாற்றமே.

2024ஆம் ஆண்டை நோக்கிப் பார்க்கும்போது, இலங்கை மக்கள் எதிர்கொண்டிருந்தது வெறுமனே பொருளாதார நெருக்கடி மாத்திரமல்ல. அதனுடன் நீண்டகாலமாக தேங்கியிருந்த அரசியல் விரக்தியும் மக்களின் மனங்களில் ஆழமாகப் பதிந்திருந்தது. ஊழல், மோசடி, அதிகார துஷ்பிரயோகம், குடும்பவாதம், ஜனநாயக விழுமியங்களுக்கு முரணான செயற்பாடுகள் எனக் கடந்தகால ஆட்சிமுறைகள் மீது முன்வைக்கப்பட்ட பல்வேறு விமர்சனங்களால் மக்கள் பெரும் விரக்தியடைந்திருந்தனர். அரசியல் அதிகாரமும் நாட்டின் வளங்களும் ஒரு குறுகிய வட்டத்துக்குள் குவிந்துவிட்டதாக மக்கள் மத்தியில் நிலவிய அதிருப்தியும் இதனுடன் இணைந்திருந்தது. இதனால் புதிய அரசியல் கலாசாரத்துக்கான எதிர்பார்ப்பு சமூகத்தின் பல்வேறு மட்டங்களிலும் வலுப்பெற்றிருந்தது.

ஊழல் மற்றும் மோசடியற்ற நிர்வாகம், சட்டத்தின் முன் அனைவரும் சமம் என்ற நடைமுறை, அரசியல் அதிகாரம் மக்களுக்குப் பொறுப்புக்கூற வேண்டிய நிலை, நாட்டின் வளங்கள் மக்களின் நலனுக்காகப் பயன்படுத்தப்பட வேண்டும் என்ற எதிர்பார்ப்பு ஆகியவை அந்த மாற்றத்தின் முக்கிய அம்சங்களாக அமைந்தன. இந்தப் பின்னணியிலேயே, தேசிய மக்கள் சக்தியைச் சுற்றி இன, மத, பிராந்திய வேறுபாடுகளைக் கடந்து மக்கள் ஒன்றிணைந்தனர்.

2024 செப்டெம்பர் 21ஆம் திகதி நடைபெற்ற ஜனாதிபதித் தேர்தல் அந்த அரசியல் மாற்றத்தின் முக்கியமான திருப்புமுனையாக அமைந்தது. சிங்கள, தமிழ், முஸ்லிம் உள்ளிட்ட நாட்டின் பல்வேறு சமூகங்களைச் சேர்ந்த மக்கள் புதிய அரசியல் பாதைக்காக தமது வாக்குகளைப் பயன்படுத்தினர். அதன் தொடர்ச்சியாக தேசிய மக்கள் சக்தியின் வேட்பாளர் அநுர குமார திசாநாயக்க ஜனாதிபதியாகத் தெரிவுசெய்யப்பட்டார். அதன் பின்னர் உருவான அரசாங்கம், தனது ஆட்சியின் அடிப்படை நோக்கங்களில் ஒன்றாக அரசியல் கலாசாரத்தில் மாற்றத்தை ஏற்படுத்துவதை முன்வைத்தது.

புதிய அரசாங்கம் பதவியேற்ற பின்னர், முன்னாள் ஜனாதிபதிகள் உள்ளிட்ட அரசியல்வாதிகள் அனுபவித்துவந்த சில சிறப்புரிமைகளை குறைப்பதற்கான நடவடிக்கைகள் மேற்கொள்ளப்பட்டன. அரசியல் அதிகாரம் என்பது தனிப்பட்ட சலுகைகளை அனுபவிப்பதற்கான கருவியாக இருக்கக்கூடாது என்ற நிலைப்பாடு வலியுறுத்தப்பட்டது. அதேவேளை, ஊழல் எதிர்ப்புச் சட்டங்களை நடைமுறைப்படுத்துவதற்கும், ஊழல் தொடர்பான விசாரணைகளை வலுப்படுத்துவதற்கும் நடவடிக்கைகள் முன்னெடுக்கப்பட்டன. நீண்டகாலமாக சட்டங்களும் நிறுவனங்களும் இருந்தபோதிலும், ஊழல் எதிர்ப்பு நடவடிக்கைகள் நடைமுறையில் போதுமான தாக்கத்தை ஏற்படுத்தவில்லை என்ற விமர்சனங்களுக்கு மத்தியில், அந்த நிலைமையை மாற்றுவதற்கான முயற்சிகள் முன்னெடுக்கப்பட்டன.

மிகப்பெரிய நிதி மோசடிகள் மற்றும் ஊழல் குற்றச்சாட்டுகள் தொடர்பான விசாரணைகள் மட்டுமன்றி, நாட்டையே உலுக்கிய உயிர்த்த ஞாயிறு தாக்குதல் போன்ற சம்பவங்கள் தொடர்பான விசாரணைகளையும் துரிதப்படுத்துவதற்கான நடவடிக்கைகள் மேற்கொள்ளப்பட்டன. கடந்த காலங்களில் தீர்வு காணப்படாமல் நீண்டகாலமாக நிலுவையில் இருந்த பல்வேறு முக்கிய விவகாரங்களுக்கு சட்டரீதியான நடவடிக்கைகள் மூலம் தீர்வு காண வேண்டும் என்ற அரசாங்கத்தின் நிலைப்பாடும் இதன் ஊடாக வெளிப்படுத்தப்பட்டது.

இதேவேளை, பாதாள உலகக் குழுக்களின் செயற்பாடுகள் மற்றும் போதைப்பொருள் கடத்தல் ஆகியவற்றுக்கு எதிரான நடவடிக்கைகளும் தீவிரப்படுத்தப்பட்டன. கடந்த காலங்களில் நாட்டின் பல பகுதிகளில் பாதாள உலகக் குழுக்களும் போதைப்பொருள் வலையமைப்புகளும் செல்வாக்கு செலுத்தியதாகவும், அவற்றுக்கும் அரசியல் அதிகாரத்துக்கும் இடையில் தொடர்புகள் இருந்ததாகவும் பல்வேறு குற்றச்சாட்டுகள் முன்வைக்கப்பட்டிருந்தன. அந்த நிலைமையை மாற்றி, நாட்டில் சட்டத்தின் ஆட்சியை உறுதிப்படுத்துவதற்காக போதைப்பொருள் ஒழிப்பு மற்றும் பாதாள உலகக் குழுக்களுக்கு எதிரான நடவடிக்கைகள் முன்னெடுக்கப்பட்டன.

வெளிநாடுகளில் இருந்து செயற்படுவதாகக் கூறப்படும் குற்றக் குழுக்களுடன் தொடர்புடைய சந்தேகநபர்களைக் கைது செய்து இலங்கைக்கு அழைத்து வருவதற்கான நடவடிக்கைகளும் மேற்கொள்ளப்பட்டன. நாட்டின் ஒவ்வொரு குடும்பத்தையும் போதைப்பொருள் அச்சுறுத்தலிலிருந்து பாதுகாப்பதும், எதிர்கால தலைமுறைக்கு பாதுகாப்பான சூழலை உருவாக்குவதும் அரசாங்கத்தின் முக்கிய சமூகப் பொறுப்பாக முன்வைக்கப்பட்டது.

‘கிளீன் ஸ்ரீலங்கா’ போன்ற திட்டங்களும் இந்தப் புதிய அரசியல் அணுகுமுறையின் ஒரு பகுதியாக முன்வைக்கப்பட்டன. இது வெறுமனே வீதிகள், பொது இடங்கள் மற்றும் சுற்றுச்சூழலைச் சுத்தப்படுத்தும் திட்டமாக மட்டும் பார்க்கப்படவில்லை. நாட்டின் ஒழுக்கம், பொதுப் பொறுப்பு, சமூகப் பொறுப்பு மற்றும் மக்களின் மனப்பாங்கில் மாற்றத்தை ஏற்படுத்தும் பரந்த முயற்சியாகவும் அது முன்வைக்கப்பட்டது. அரசியல் மாற்றம் என்பது ஆட்சியாளர்களை மாற்றுவதில் மட்டும் முடிவடையாமல், சமூகத்தின் சிந்தனை முறையிலும் மாற்றத்தை ஏற்படுத்த வேண்டும் என்ற கருத்து இதன் பின்னணியில் வலியுறுத்தப்பட்டது.

அரசியல் மாற்றத்துடன் இணைந்து அரசாங்கம் எதிர்கொண்ட மிகப்பெரிய சவால் பொருளாதார மீட்சியாகும். 2022ஆம் ஆண்டு ஏற்பட்ட கடுமையான பொருளாதார நெருக்கடி, அத்தியாவசியப் பொருட்களின் பற்றாக்குறை, வெளிநாட்டு நாணய நெருக்கடி, கடன் சுமை உள்ளிட்ட பிரச்சினைகள் மக்களின் அன்றாட வாழ்க்கையில் ஏற்படுத்திய தாக்கம் இன்னும் மறக்க முடியாததாக உள்ளது. அந்தப் பின்னணியில் நாட்டின் பொருளாதாரத்தை நிலைப்படுத்துவதும், அரச திறைசேரியை வலுப்படுத்துவதும் புதிய அரசாங்கத்தின் முக்கிய பணியாக அமைந்தது.

பொருளாதார நெருக்கடியிலிருந்து நாடு மீள்வதற்கு நீண்ட காலம் தேவைப்படும் என பல்வேறு எதிர்பார்ப்புகள் நிலவியிருந்த நிலையில், பொருளாதாரத்தை மீளக் கட்டியெழுப்புவதற்கான நடவடிக்கைகள் விரைவாக முன்னெடுக்கப்பட்டன. 2025ஆம் ஆண்டில் இலங்கை 5 சதவீத உண்மையான பொருளாதார வளர்ச்சியைப் பதிவு செய்ததாகவும், நாட்டின் பொருளாதாரம் மீண்டும் மேல்நடுத்தர வருமான நிலைக்கு வந்துள்ளதாகவும் அரசாங்கம் தெரிவித்துள்ளது. பொருளாதார மீட்சியின் பலன்கள் இன்னும் முழுமையாக மக்களின் வாழ்க்கையில் பிரதிபலிக்க வேண்டியிருந்தாலும், நெருக்கடியிலிருந்து மீள்வதற்கான வலுவான அடித்தளம் உருவாக்கப்பட்டுள்ளதாக அரசாங்கம் வலியுறுத்துகிறது.

பொருளாதார வளர்ச்சி என்பது புள்ளிவிபரங்களில் மட்டும் பிரதிபலிக்கக்கூடிய ஒன்றல்ல. அதன் உண்மையான பலன் சாதாரண மக்களின் வாழ்க்கையில் வெளிப்பட வேண்டும் என்பதே அடுத்த கட்டத்தின் முக்கிய நோக்கமாக முன்வைக்கப்படுகிறது. நகரங்களையும் பொருளாதார ரீதியாக முன்னேறிய பகுதிகளையும் தாண்டி, தொலைதூர கிராமங்களில் வாழும் மக்களுக்கும் பொருளாதார வளர்ச்சியின் பலன்கள் சென்றடைய வேண்டும் என்பதில் அரசாங்கம் கவனம் செலுத்துகிறது.

இதன் தொடர்ச்சியாக, 2027ஆம் ஆண்டுக்கான அபிவிருத்தி நடவடிக்கைகளுக்காக 2,000 பில்லியன் ரூபா மூலதனச் செலவினம் திட்டமிடப்பட்டுள்ளதாக அரசாங்கம் அறிவித்துள்ளது. நாட்டின் உட்கட்டமைப்பு மற்றும் அபிவிருத்தித் தேவைகளை முன்னெடுப்பதற்கான இந்த முதலீடு, பொருளாதார மீட்சியை நீண்டகால அபிவிருத்தியாக மாற்றுவதற்கான முயற்சியின் ஒரு பகுதியாகக் கருதப்படுகிறது.

அதேவேளை, அரச சேவையை வலுப்படுத்துவதும் அரசாங்கத்தின் முக்கிய முன்னுரிமைகளில் ஒன்றாக உள்ளது. அரச சேவையில் நிலவும் வெற்றிடங்களை முறையான நடைமுறைகளின் ஊடாக நிரப்புதல், பொதுமக்களுக்குத் தேவையான சேவைகளை தாமதமின்றி வழங்குதல் மற்றும் டிஜிட்டல் தொழில்நுட்பத்தின் மூலம் அரச சேவைகளை எளிமைப்படுத்துதல் ஆகிய நடவடிக்கைகள் முன்னெடுக்கப்பட்டு வருகின்றன. மக்களுக்காக இயங்க வேண்டிய அரச சேவை, மக்களை அலைக்கழிக்கும் அமைப்பாக அல்லாமல், அவர்களின் தேவைகளுக்குப் பதிலளிக்கும் திறன் கொண்ட அமைப்பாக மாற்றப்பட வேண்டும் என்பதே இதன் அடிப்படை நோக்கமாகும்.

ஒரு நாட்டின் நீண்டகால வளர்ச்சிக்கு சுகாதாரம், விவசாயம் மற்றும் போக்குவரத்து போன்ற அடிப்படைத் துறைகள் வலுப்படுத்தப்பட வேண்டியது அவசியமாகும். அந்த அடிப்படையில், நாட்டின் வடக்கிலிருந்து தெற்கு வரையிலும் சுகாதார வசதிகளை மேம்படுத்துவதற்கான நடவடிக்கைகள் முன்னெடுக்கப்படுகின்றன. நீண்டகாலமாக நிலவி வந்த குறைபாடுகளை நிவர்த்தி செய்வதுடன், விவசாய உற்பத்தியை அதிகரித்தல், விவசாயிகளின் வாழ்வாதாரத்தை வலுப்படுத்துதல் மற்றும் போக்குவரத்து உட்கட்டமைப்பை மேம்படுத்துதல் ஆகியவற்றிலும் கவனம் செலுத்தப்படுகிறது.

நாடு பொருளாதார ரீதியாக மீண்டு வரும் காலகட்டத்திலேயே இயற்கை அனர்த்தங்களும் புதிய சவால்களை ஏற்படுத்தின. குறிப்பாக ‘தித்வா’ சூறாவளியால் ஏற்பட்ட பாதிப்புகள் நாட்டின் மீட்பு செயற்பாடுகளுக்கு புதிய சவாலை ஏற்படுத்தின. எனினும், அந்தச் சூழ்நிலையிலும் மீட்பு மற்றும் மறுசீரமைப்பு நடவடிக்கைகளை முன்னெடுப்பதற்கான அரசாங்கத்தின் திறன் சோதிக்கப்பட்டது. இதன்போது வெளிநாடுகளிடமிருந்து கிடைத்த உதவிகளும் இலங்கையின் மீட்பு முயற்சிகளுக்கு முக்கிய பங்களிப்பை வழங்கின.

இந்த இரண்டு ஆண்டுகால பயணத்தைப் பார்க்கும்போது, அரசாங்கம் முன்வைக்கும் முக்கிய வாதம் ஒன்றே. அரசியல் அதிகாரத்தில் ஏற்பட்ட மாற்றம் வெறுமனே ஆட்சியாளர்களை மாற்றுவதற்கான நடவடிக்கை அல்ல. அது நாட்டின் அரசியல் கலாசாரத்தையும், நிர்வாக முறையையும், பொருளாதார நிர்வாகத்தையும் மாற்றுவதற்கான தொடக்கமாகும் என்பதே அந்த வாதமாகும்.

கடந்த கால ஆட்சிகளின் மீது முன்வைக்கப்பட்ட ஊழல், குடும்பவாதம், அதிகார துஷ்பிரயோகம் மற்றும் சட்டத்தின் ஆட்சியைப் பாதித்ததாகக் கூறப்பட்ட செயற்பாடுகளுக்கு மாற்றாக, சட்டத்தின் முன் அனைவரும் சமம் என்ற நிலைப்பாட்டையும் பொறுப்புக்கூறலையும் முன்னிறுத்தும் நிர்வாகத்தை உருவாக்குவதே தற்போதைய அரசாங்கத்தின் இலக்காக முன்வைக்கப்படுகிறது.

எனினும், எந்தவொரு அரசாங்கத்தினதும் வெற்றியை இறுதியில் தீர்மானிப்பது அது அறிவிக்கும் திட்டங்களின் எண்ணிக்கை அல்ல. மாறாக, அந்தத் திட்டங்கள் மக்களின் வாழ்க்கையில் ஏற்படுத்தும் உண்மையான மாற்றமே.

பொருளாதார வளர்ச்சியின் பலன் தொலைதூர கிராமங்களைச் சென்றடைகிறதா, மக்களின் வருமானமும் வாழ்க்கைத்தரமும் உயர்கிறதா, அரச சேவைகள் வேகமாகவும் வெளிப்படையாகவும் கிடைக்கின்றனவா, சுகாதாரம் மற்றும் கல்வி வசதிகள் மேம்படுகின்றனவா, சட்டம் அனைவருக்கும் சமமாக நடைமுறைப்படுத்தப்படுகிறதா என்பவையே அடுத்த கட்டத்தில் முக்கியமான கேள்விகளாக இருக்கும்.

கடந்த காலத்தின் அரசியல் மற்றும் பொருளாதார அனுபவங்களிலிருந்து பாடம் கற்று, அரசியல் அதிகாரத்தை மக்களின் நலனுக்காகப் பயன்படுத்தும் புதிய கலாசாரத்தை நிலைநிறுத்துவது நீண்டகாலப் பணியாகும். அந்தப் பயணத்தில் ஊழலற்ற நிர்வாகம், வலுவான அரச சேவை, நிலையான பொருளாதாரம், சட்டத்தின் ஆட்சி மற்றும் அபிவிருத்தியின் பலன் சமூகத்தின் அனைத்து பிரிவுகளையும் சென்றடையும் அமைப்பு ஆகியவை முக்கியமானவை.

ஆட்சியாளர்களின் குடும்பத்தை மையமாகக் கொண்ட அரசியலுக்கு பதிலாக, நாட்டின் ஒவ்வொரு குடிமகனுக்கும் பாதுகாப்பானதும் கண்ணியமானதுமான எதிர்காலத்தை உருவாக்குவதே தற்போதைய அரசாங்கத்தின் முக்கிய இலக்காக முன்வைக்கப்படுகிறது. கடந்த இரண்டு ஆண்டுகளில் அந்த மாற்றத்திற்கான அடித்தளம் அமைக்கப்பட்டுள்ளதாக அரசாங்கம் வலியுறுத்தும் நிலையில், அடுத்த கட்டத்தில் அந்த மாற்றத்தின் பலன் சாதாரண மக்களின் வாழ்க்கையில் எந்த அளவுக்கு வெளிப்படுகிறது என்பதே அதன் அரசியல் பயணத்தின் முக்கிய சோதனையாக அமையும்.

2027ஆம் ஆண்டு இந்தப் பயணத்தின் அடுத்த முக்கிய கட்டமாக எதிர்பார்க்கப்படுகிறது. பொருளாதார வளர்ச்சியை மக்களின் வாழ்க்கைத் தர உயர்வுடன் இணைத்து, நாட்டின் அனைத்து பகுதிகளுக்கும் அபிவிருத்தியின் பலன்களை கொண்டு சென்று, சட்டத்தின் ஆட்சியையும் பொறுப்புக்கூறலையும் மேலும் வலுப்படுத்துவதன் மூலம் புதிய அரசியல் கலாசாரத்தை நிலைநிறுத்துவதற்கான ஆண்டாக அது அமைய வேண்டும் என்பதே தற்போதைய அரசாங்கம் முன்வைக்கும் எதிர்பார்ப்பாகும்