ஹிஜாப் அணிந்து பொத்துவில் கலாச்சாரத்தை அனுபவித்த நியூசிலாந்து இளம் பெண்கள்-அருகம்பையில் நெகிழ்ச்சிச் சம்பவம்
சுற்றுலாப் பயணிகளை விருந்தோம்பலால் கவர்ந்த ‘மொரிட்டா அட்வென்ச்சர்ஸ்’ தஸ்லிம்
அம்பாறை மாவட்டம் பொத்துவில், அருகம்பை பகுதிக்குச் சுற்றுலா வருகை தந்த நியூசிலாந்து நாட்டைச் சேர்ந்த இளம் சுற்றுலாப் பயணிகள் இருவர், உள்ளூர் இஸ்லாமியக் கலாச்சாரத்தை மதித்து ஹிஜாப் ஆடை அணிந்து மகிழ்ந்த நெகிழ்ச்சியான சம்பவம் ஒன்று இடம்பெற்றுள்ளது.
அருகம்பையில் ‘மொரிட்டா அட்வென்ச்சர்ஸ்’ (Morita Adventures) எனும் சுற்றுலாச் சேவையை வெற்றிகரமாக நடத்தி வரும் தஸ்லிம் என்பவரின் வழிகாட்டலில் குறித்த வெளிநாட்டுச் சுற்றுலாப் பயணிகள் கடல் பயண மேற்சென்று பொழுதைக் கழித்துள்ளனர்.
இதனைத் தொடர்ந்து, சகோதரர் தஸ்லிமின் வீட்டிற்கு விஜயம் செய்த அவர்கள், அவரது குடும்பத்தினரின் உபசரிப்பிலும் திளைத்து விருந்தோம்பலில் பங்கேற்றனர்.
இதன்போது, பொத்துவில் மக்களின் இயல்பான வாழ்க்கை முறையையும் கலாச்சாரத்தையும் ஆச்சரியத்துடன் நோக்கிய அந்த இளம் பெண்கள், உள்ளூர் கலாச்சாரத்தின் மீதான விருப்பத்தினால் இஸ்லாமியப் பெண்கள் அணியும் ‘ஹிஜாப்’ ஆடையைக் கேட்டு வாங்கி அணிந்து கொண்டு புகைப்படங்கள் எடுத்துத் தமது மகிழ்ச்சியைப் பகிர்ந்து கொண்டனர்.
அருகம்பைக்கு வரும் வெளிநாட்டுச் சுற்றுலாப் பயணிகளுக்குப் பொழுபோக்குச் சேவைகளை வழங்குவதுடன் மட்டுமன்றி, பிராந்தியத்தின் தனித்துவமான கலாச்சாரத்தையும் நற்பண்புகளையும் அவர்களிடம் எடுத்துரைத்து நன்மதிப்பைப் பெற்று வரும் சகோதரர் தஸ்லிமின் இச்செயற்பாடு அப்பகுதி மக்களிடையே பெரும் பாராட்டையும் வரவேற்பையும் பெற்று வருகின்றது.
