இலங்கைக்கு புதிய காலநிலை எச்சரிக்கை ; எல் நினோ தாக்கம் நீடிக்கும் சாத்தியம்

நாட்டின் தென்மேற்கு பிராந்தியங்களில் தற்போது நிலவி வரும் மழையுடனான வானிலை மேலும் சில நாட்களுக்கு தொடரும் என வளிமண்டலவியல் திணைக்களம் எதிர்வுகூறியுள்ளது.

தற்போது தென்மேற்கு பகுதிகளில் காணப்படும் மழைப்பொழிவு எதிர்வரும் நாட்களிலும் நீடிக்கும் எனத் தெரிவிக்கப்பட்டுள்ள நிலையில், ஓகஸ்ட் 15ஆம் திகதிக்குப் பின்னரே மழையின் தாக்கம் படிப்படியாகக் குறையக்கூடும் என வானிலை ஆய்வாளர் ஸ்ரீமால் ஹேரத் தெரிவித்துள்ளார்.

இதேவேளை, இலங்கையின் காலநிலையில் தாக்கத்தை ஏற்படுத்தி வரும் ‘எல் நினோ’ (El Niño) காலநிலை மாற்றத்தின் தாக்கம், அடுத்த ஆண்டின் வடகிழக்கு பருவக்காற்று காலம் வரையிலும் நீடிப்பதற்கான சாத்தியக்கூறுகள் அதிகமாக உள்ளதாகவும் அவர் சுட்டிக்காட்டியுள்ளார்.

எல் நினோவின் தாக்கம் நீடிக்கும் பட்சத்தில், தற்போது வறட்சியால் பாதிக்கப்பட்டுள்ள நாட்டின் பல பகுதிகளில் காலநிலை நிலைமை மேலும் மோசமடையக்கூடும் என எதிர்பார்க்கப்படுகிறது.

குறிப்பாக, நீர்வளப் பற்றாக்குறை மற்றும் அதிக வெப்பநிலை போன்ற நிலைமைகள் தொடர்ந்து மக்களின் அன்றாட வாழ்க்கையில் தாக்கத்தை ஏற்படுத்தக்கூடும் என எச்சரிக்கை விடுக்கப்பட்டுள்ளது.

மேலும், தொடர்ச்சியான வறட்சியின் காரணமாக சில பகுதிகளில் காற்றின் வேகம் குறையக்கூடும் எனவும் தெரிவிக்கப்பட்டுள்ளது. காற்றின் வேகம் குறைவதுடன் வளிமண்டலத்தில் ஈரப்பதம் அதிகரிக்கும் போது, மக்கள் உடலால் உணரும் வெப்பநிலை உண்மையான வெப்பநிலையை விட அதிகமாக இருக்கக்கூடும்.

இதனால், அதிக வெப்பம் நிலவும் பகுதிகளில் வசிக்கும் பொதுமக்கள் குறிப்பாக பகல் நேரங்களில் அவதானமாக இருக்குமாறும், போதுமான அளவு நீரை அருந்துவதுடன், நீண்ட நேரம் நேரடி வெயிலில் இருப்பதைத் தவிர்க்குமாறும் அறிவுறுத்தப்படுகின்றனர்.

தற்போதைய மழையுடனான வானிலை மற்றும் எதிர்வரும் காலநிலை மாற்றங்களை பொதுமக்கள் தொடர்ந்து அவதானிக்க வேண்டும் எனவும், வளிமண்டலவியல் திணைக்களம் வெளியிடும் அதிகாரப்பூர்வ அறிவிப்புகளுக்கு ஏற்ப தேவையான முன்னெச்சரிக்கை நடவடிக்கைகளை மேற்கொள்ளுமாறும் கேட்டுக்கொள்ளப்பட்டுள்ளது.