வெடுக்குநாறிமலை வழிபாடு பொலிசாரின் விண்ணப்பம் நீதிமன்றால் நிராகரிப்பு: நேரத்தை வீண்டிக்கவேண்டாம் எனவும் அறிவுரை…!

வெடுக்குநாறிமலையில் இரு தரப்புக்கள் ஒரே நேரத்தில் வழிபடுவதால் சமாதானகுலைவு ஏற்ப்படும் என்ற நெடுங்கேணி பொலிசாரின் விண்ணப்பம் வவுனியா நீதிமன்றால் இன்று (24.09) நிராகரிக்கப்பட்டதுடன் சட்டம் மீறப்பட்டால் மாத்திரமன்றி மாறாக நேரத்தை வீண்டிக்க வேண்டாம் என்றும் பொலிசாருக்கு நீதவான் அறிவுறுத்தியுள்ளார்.

நெடுங்கேணி வெடுக்குநாறி மலையில் எதிர்வரும் சனிக்கிழமை வடக்குமாகாண தலைமை தேரர் சந்தபோதி தலைமையில் பௌத்த நிகழ்வு ஒன்று ஏற்ப்பாடாகியுள்ளது. இந்நிலையில் அன்றையதினம் சைவமக்கள் புரட்டாதி சனி விசேட பூஜை வழிபாடுகளில் அங்கு ஈடுபடவுள்ளனர்.

இந்த நிலையில் குறித்த தினத்தில் அந்தபகுதியில் இருதரப்பும் ஒரே நேரத்தில் வழிபாட்டிற்கு செல்வதால் சமாதான குலைவு ஏற்ப்படும் என்று நெடுங்கேணி பொலிசார் வவுனியா நீதிமன்றிற்கு அறிக்கை சமர்ப்பித்துள்ளனர்.

இதனையடுத்து ஆலயத்தின் நிர்வாகத்தினரும் பௌத்த தேரர் தரப்பும் நீதிமன்றிற்கு அழைக்கப்பட்டிருந்தனர்.

இதன்போது வெடுக்குநாறிமலையில் வழிபடும் சுதந்திரத்திற்கு தடை ஏற்ப்படுத்த முடியாது என உயர் நீதிமன்றம் ஏற்கனவே உத்தரவிட்டுள்ளதை சட்டத்தரணி எம்.ஏ..சுமந்திரன் மன்றுக்கு சுட்டிக்காட்டியிருந்தார்.

அத்துடன் சட்டம் மீறப்படுகின்ற சந்தர்ப்பத்தில் மாத்திரம் பொலிசார் நீதிமன்றிற்கு வரவேண்டும் மாறாக மன்றின் நேரத்தை வீணாக்க கூடாது என்று நீதவான் பொலிசாருக்கு உத்தரவிட்டதுடன் பொலிசாரின் விண்ணப்பத்தையும் நிராகரித்துள்ளார்.

இதேவேளை ஆலயநிர்வாகம் சார்பாக ஜனாதிபதி சட்டத்தரணி எம்.ஏ.சுமந்திரன் தலைமையில் சிரேஸ்ட சட்டத்தரணி தி.திருவருள் ஆகியோர் முன்னிலையாகியிருந்தனர். அத்துடன் கல்கமுவ சந்தபோதிதேரரும் அவரது சட்டத்தரணிகளும் முன்னிலையாகியிருந்தனர்.