யாழ்ப்பாணத்திற்கு 3300 வீடுகள் தேவை

உலக வாழ்விட தினத்தை முன்னிட்டு, வீட்டுத்திட்ட நிர்மாணப் பணிகளைப் பூர்த்தி செய்த 257 பயனாளிகளுக்கான சான்றிதழ்கள் வழங்கும் நிகழ்வு, யாழ்ப்பாண மாவட்ட செயலக கேட்போர் கூடத்தில் நேற்றைய தினம் புதன்கிழமை நடைபெற்றது.

அதில் கலந்து கொண்டு உரையாற்றும் போதே மாவட்ட செயலர் அவ்வாறு தெரிவித்தார்.

கடந்த காலங்களில் வீடமைப்புத் திட்டங்களின் கீழ் 6 இலட்சம், 10 இலட்சம் மற்றும் 15 இலட்சம் ரூபா என வெவ்வேறு அளவுகளில் நிதி வழங்கப்பட்ட நிலையில், இம்முறை 20 இலட்சம் ரூபாவாக நிதி ஒதுக்கீடு அதிகரிக்கப்பட்டுள்ளது

கடந்த காலங்களில் போதிய நிதியின்மையால் வீடுகளை அமைப்பதில் பயனாளிகள் பல்வேறு சிரமங்களை எதிர்கொண்டனர்.

வாடகை வீடுகளிலும் தற்காலிக குடியிருப்புகளிலும் வாழ்ந்த குடும்பங்கள், குறிப்பாகப் பிள்ளைகளின் கல்வி மற்றும் அன்றாட வாழ்க்கையில் பல்வேறு சவால்களைச் சந்தித்தனர்.

இத்தகைய துன்பங்களுக்கு முற்றுப்புள்ளி வைத்து, பயனாளிகள் தமக்கென வீடுகளை அமைத்து மகிழ்ச்சியாக வாழ்வதற்கான வாய்ப்பை இத்திட்டம் ஏற்படுத்தும் என நம்புகின்றேன்.

யாழ்ப்பாண மாவட்டத்தில் உள்நாட்டு யுத்தம் காரணமாக இடம்பெயர்ந்து மீளக்குடியமர்ந்த  அண்ணளவாக 3,300 குடும்பங்களுக்கு வீடமைப்புத் தேவை காணப்படுகின்றது.

 இதுவரை கிடைக்கப்பெற்ற விண்ணப்பங்களின் அடிப்படையில் 2,000 இற்கும் மேற்பட்ட குடும்பங்களின் தேவைகள் கவனத்தில் கொள்ளப்பட வேண்டியுள்ளன.

குறிப்பாக, காணியற்ற குடும்பங்கள் மற்றும் யுத்தத்தினால் வீடுகளையும் வாழ்வாதாரங்களையும் இழந்த மக்கள் எதிர்கொள்ளும் பிரச்சினைகளுக்குத் தீர்வு காண வேண்டியுள்ளது.

எனவே இத்திட்டத்தின் மூலம் பயனடையும் அனைத்து குடும்பங்களும் தமது வீடுகளை நிறைவு செய்து, குடும்பத்தினருடனும் பிள்ளைகளுடனும் பாதுகாப்பான, மகிழ்ச்சியான வாழ்க்கையை அமைத்துக்கொள்ள வேண்டும் என தெரிவித்தார்.