;
Athirady Tamil News

நிந்தவூர் கடல் அனர்த்தம்-மாணவரைக் காப்பாற்றச் சென்ற இளைஞர் சடலமாக மீட்பு- மற்றைய மாணவரைத் தேடும் பணிகள் தொடர்கின்றன

0
அம்பாறை மாவட்டம், நிந்தவூர் கடற்கரையில் நேற்று (20) கடலில் நீராடச் சென்று அலையில் இழுத்துச் செல்லப்பட்ட மாணவர்களைக் காப்பாற்ற முயன்று காணாமல் போன 23 வயதுடைய இளைஞரின் சடலம் இன்று (21) மீட்கப்பட்டுள்ளதுடன், காணாமல் போயுள்ள மற்றைய மாணவரைத் தேடும் பணிகள் தொடர்ந்தும் முன்னெடுக்கப்பட்டு வருகின்றன.

இச்சோகச் சம்பவம் குறித்த விரிவான விவரங்கள் வருமாறு:

கடலில் மூழ்கிய மாணவர்களைக் காப்பாற்ற முயன்று அலையில் இழுத்துச் செல்லப்பட்ட நவ்ஷாத் ஹஃபுனத் (வயது 23) என்ற இளைஞரின் சடலமே இன்று மீட்கப்பட்டுள்ளது. மீட்கப்பட்ட சடலம் தற்போது பிரேதப் பரிசோதனைக்காக நிந்தவூர் ஆதார வைத்தியசாலையில் வைக்கப்பட்டுள்ளது.

இதேவேளை, கடலில் காணாமல் போயுள்ள மொஹம்மட் அன்பர் ஆத்தீப் (வயது 19) என்ற மாணவரைத் தேடும் பணிகள் தொடர்ந்தும் தீவிரமாக முன்னெடுக்கப்பட்டு வருகின்றன. நேற்று உயிருடன் மீட்கப்பட்ட நிலாம் அப்துல்லா ஆபித் (வயது 17) என்ற மாணவர் அம்பாறை பொது வைத்தியசாலையின் தீவிர சிகிச்சைப் பிரிவில் தொடர்ந்து சிகிச்சை பெற்று வருகின்றார்.

சம்பவத்தின் பின்னணி:
நேற்று (20) மதியம் ஐந்து மாணவர்கள் நிந்தவூர் கடற்கரைக்குச் சென்றிருந்த நிலையில், அவர்களில் இருவர் கடலில் இறங்கி நீராடியுள்ளனர். இதன்போது எதிர்பாராத விதமாக ஒருவர் கடல் அலையில் இழுத்துச் செல்லப்பட்டதைத் தொடர்ந்து கரையிலிருந்த ஏனைய மாணவர்கள் அபயக்குரல் எழுப்பியுள்ளனர்.

அவர்களின் கூக்குரலைக் கேட்ட அப்பகுதியிலிருந்த பொதுமகனான நவ்ஷாத் ஹஃபுனத், உடனடியாகக் கடலில் குதித்து அலையில் சிக்கியிருந்த நிலாம் அப்துல்லா ஆபித் என்ற மாணவரைப் போராடி மீட்டுக் கரைக்குக் கொண்டு வந்துள்ளார். தொடர்ந்து, கடலில் தத்தளித்துக் கொண்டிருந்த மற்றைய மாணவரான மொஹம்மட் அன்பர் ஆத்தீப்பைக் காப்பாற்றுவதற்காக அவர் மீண்டும் கடலுக்குள் சென்றபோது, எதிர்பாராத விதமாக அவரும் குறித்த மாணவரும் பாரிய அலையில் அடித்துச் செல்லப்பட்டுக் காணாமல் போயினர்.

சம்பவம் இடம்பெற்ற நேற்று முதல் நிந்தவூர் பொலிஸ் நிலையப் பொறுப்பதிகாரியின் தலைமையிலான பொலிஸார், இராணுவத்தினர், இலங்கை கடற்படையினர் ஆகியோர் நவீன ட்ரோன் (Drone) தொழில்நுட்பத்தின் உதவியுடன் தீவிர தேடுதல் நடவடிக்கைகளை முன்னெடுத்து வருகின்றனர். இதற்கு மேலதிகமாக, சாய்ந்தமருது ஜனாஸா பேரவை, கல்முனை ஆழ்கடல் மீட்புக் குழுவினர் மற்றும் நிந்தவூர் ஜனாஸா நலன்புரி அமைப்பு உள்ளிட்ட தன்னார்வ மீட்புக் குழுவினரும் தேடுதல் பணிகளில் இணைந்துள்ளனர்.

தற்போது கடலின் நீரோட்டம் அக்கரைப்பற்று திசையை நோக்கிச் செல்வதாகத் தெரிவிக்கப்படுவதால், ஒலுவில், பாலமுனை, அட்டாளைச்சேனை, அக்கரைப்பற்று மற்றும் திருக்கோவில் உள்ளிட்ட தென்கிழக்குக் கடலோரப் பகுதிகளில் வசிக்கும் மீனவர்கள், கடலுக்குச் செல்வோர் மற்றும் பொதுமக்கள் மிகுந்த அவதானத்துடன் செயற்படுமாறு கேட்டுக்கொள்ளப்படுகின்றனர்.

மற்றொரு உயிரைக் காப்பாற்றுவதற்காகத் தனது உயிரைப் பணயம் வைத்த இளைஞர் சடலமாக மீட்கப்பட்டமை நிந்தவூர் மற்றும் அதனைச் சூழவுள்ள பிரதேச மக்களிடையே பெரும் சோகத்தை ஏற்படுத்தியுள்ளது.

You might also like

Leave A Reply

Your email address will not be published.