சமாதானத்துக்கான நோபல் பரிசுபெறும் இந்திய வம்சாவளி தமிழ் பெண் நவி பிள்ளை!

உலகளாவிய ரீதியில் ‘நவி பிள்ளை’ என அறியப்படும் நவநீதம் பிள்ளை, பிறப்பால் தென்னாப்பிரிக்கர்; ஆனால், இந்தியத் தமிழ் வம்சாவளியைச் சேர்ந்தவர். சில காலங்களுக்கு முன்னர் இந்தியத் தொலைக்காட்சியொன்றில் அவரது தமிழ் அடையாளம் பற்றிக் கேட்கப்பட்ட போது, தனது பாரம்பரியத் தமிழ் அடையாளம் குறித்துப் பெருமைப்பட்ட போதிலும், சர்வதேசப் பணியின் நிமித்தம் தனது முதன்மை அடையாளம் தென்னாப்பிரிக்கர் தான் எனக் குறிப்பிட்டிருந்தார்.

சர்வதேச மனித உரிமைகள் மற்றும் சட்டத் துறையில் முன்னோடியாக விளங்கும் இவர், தென்னாப்பிரிக்காவில் நிறவெறிக்கு எதிரான போராட்டத்திலிருந்து ஐக்கிய நாடுகள் சபையின் மிக உயரிய மனித உரிமைகள் ஆணையாளர் பதவி வரை உயர்ந்து, சர்வதேச அரங்கில் முக்கியத்துவம் வாய்ந்த பல பணிகளை ஆற்றியுள்ளார்.

கடந்த சில வருடங்களாக அமைதிக்கான நோபல் பரிசு தனக்குத்தான் கிடைக்க வேண்டும் என அமெரிக்க முன்னாள் ஜனாதிபதி டொனால்ட் ட்ரம்ப் கூறிவந்த நிலையில், 2026 ஆம் ஆண்டிற்கான அமைதிக்கான நோபல் பரிசு நவி பிள்ளைக்கு வழங்கப்பட்டுள்ளது. விருது அறிவிக்கப்பட்ட சில மணித்துளிகளில், “தனது நண்பர்களிடையே அமைதி நோபல் பரிசை டிரம்புடன் பங்கிடுவதில் தனக்கு ஆட்சேபனை எதுவும் இல்லை” என நவி பிள்ளை நகைச்சுவையாகத் தெரிவித்த விடயங்கள் சமூக ஊடகங்களில் வெளியாகிப் பரவின.

நவி பிள்ளை 1941 இல் தென்னாபிரிக்காவின் டேர்பன் (Durban) நகரில் தமிழ் வம்சாவளிக் குடும்பத்தில் பிறந்தார். நிறவெறி ஆட்சிக் காலத்தில் எண்ணற்ற சவால்களைச் சந்தித்து வளர்ந்த அவர், 1967 இல் நேட்டால் மாகாணத்தில் சொந்தமாகச் சட்டத் தொழிலைத் தொடங்கிய முதல் வெள்ளையரல்லாத பெண்மணி என்ற பெருமையைப் பெற்றார்.

தன் வாழ்நாள் முழுவதும் தனது தமிழ் பாரம்பரியம், கலாசாரம் மற்றும் விழுமியங்கள் குறித்து மிகுந்த பெருமிதம் கொள்வதாகத் தெரிவித்துள்ளார். இருப்பினும், சர்வதேச அமைப்புகளில் பணியாற்றியபோது, தனது நடுநிலைமையைப் பேண தான் முதன்மையாக ஒரு தென்னாப்பிரிக்கக் குடிமகள் என்பதையே உறுதியாக முன்வைத்தார். இலங்கையில் அவர் மேற்கொண்ட களப்பணிகளின் போது, அவரது தமிழ் வம்சாவளியைச் சுட்டிக்காட்டி இனவாத விமர்சனங்களும் குற்றச்சாட்டுகளும் முன்வைக்கப்பட்ட போதிலும், தொழில்முறை நடுநிலை தவறாமல் ஒரு தென்னாபிரிக்கராகவும் சர்வதேச அரசுப் பணியாளராகவும் தனது கடமையை உறுதியுடன் நிறைவேற்றினார்.

2008 முதல் 2014 வரை ஐ.நா. மனித உரிமைகள் உயர் ஆணையாளராக இருந்த காலத்தில், இலங்கையில் இடம்பெற்றதாகக் கூறப்படும் மனித உரிமை மீறல்கள் தொடர்பில் நவி பிள்ளை தீர்க்கமான பங்கு வகித்தார்:

போர் முடிவுக்கு வந்த உடனேயே, மனித உரிமை மீறல்கள் குறித்துச் சுதந்திரமான சர்வதேச விசாரணை தேவை என்று குரல் கொடுத்தார்.

யாழ்ப்பாணம், கிளிநொச்சி, முல்லைத்தீவு மற்றும் திருகோணமலை ஆகிய போரால் பாதிக்கப்பட்ட பகுதிகளுக்கு நேரில் சென்று, காணாமல் போனவர்களின் குடும்பங்களையும் பாதிக்கப்பட்ட மக்களையும் சந்தித்தார்.

2014 இல் ஐ.நா. மனித உரிமைகள் ஆணைக்குழு மூலம் இலங்கையின் போர்க் குற்றங்களை விசாரிக்கச் சுதந்திரமான சர்வதேச விசாரணை அமைப்பை உருவாக்கும் தீர்மானத்தை முன்னெடுத்தார்.

இலங்கை மட்டுமன்றி, உலகெங்கிலும் நடந்த மிக முக்கிய சர்வதேச நீதிப் போராட்டங்களில் நவி பிள்ளை பங்காற்றியுள்ளார்:

ருவாண்டா சர்வதேச குற்றவியல் தீர்ப்பாயத்தில், “பாலியல் வன்கொடுமை மற்றும் பாலியல் வன்முறைகள் இனப்படுகொலைக்கான கூறுகளாகக் கருதப்படலாம்” என்ற வரலாற்றுச் சிறப்புமிக்க 1998 ஆம் ஆண்டுத் தீர்ப்பை வழங்கியதில் இவருக்கு முக்கியப் பங்கு உண்டு.

நெதர்லாந்தின் ஹேக் நகரில் உள்ள சர்வதேச குற்றவியல் நீதிமன்றத்தில் 2003 முதல் 2008 வரை நீதிபதியாகப் பணியாற்றினார்.

2021 இல் அமைக்கப்பட்ட சுதந்திரமான பாலஸ்தீன ஆக்கிரமிப்புப் பகுதிக்கான ஐ.நா. விசாரணை ஆணைக்குழுவின் தலைவராகச் செயல்பட்டார்.

சர்வதேச குற்றவியல் நீதிமன்றத்தில் ரோஹிங்கியா மக்களுக்கு எதிராக நடந்த இனப்படுகொலை தொடர்பான வழக்கில் தற்காலிக நீதிபதியாகப் பணியாற்றி வருகிறார்.

1992 இல் “Equality Now” என்ற அமைப்பைத் தோற்றுவித்து, உலகம் முழுவதும் பெண்களின் சட்டபூர்வ உரிமைகளுக்காகப் போராடினார்.

நவி பிள்ளை தனது சர்வதேசப் பணிகளில் ‘தென்னாப்பிரிக்க நாட்டவர்’ என்ற தேசிய அடையாளத்தையும் தொழில்முறை நடுநிலையையும் உறுதியாகப் பின்பற்றி, உலகெங்கிலும் பாதிக்கப்பட்ட மக்களுக்காகவும் மனித உரிமைகளுக்காகவும் குரல் கொடுத்தார். அதேவேளையில், தனது தமிழ் வேர்களையும் பாரம்பரியத்தையும் பெருமையுடன் சுமந்து நிற்கிறார்.