அரச பேருந்து ஊழியர்கள் மீது தனியார் பேருந்தின் சாரதி மற்றும் நடத்துனர் தாக்குதல்!

அனுராதபுரத்தில் இலங்கை போக்குவரத்துச் சபைக்குச் (SLTB) சொந்தமான பேருந்தின் சாரதி மற்றும் நடத்துனர் மீது, தனியார் பேருந்தின் சாரதி மற்றும் நடத்துனர் தாக்குதல் நடத்தியதாகக் கூறப்படும் சம்பவம் தொடர்பில் பொலிஸார் விசாரணைகளை ஆரம்பித்துள்ளனர்.

கடந்த 13ஆம் திகதி மாலை, அனுராதபுரம் பொலிஸ் பிரிவுக்கு உட்பட்ட பொத்தானேகம விஜயராம ஆலயத்திற்கு அருகில் இந்தச் சம்பவம் இடம்பெற்றுள்ளதாகப் பொலிஸார் தெரிவித்துள்ளனர்.

ஒரே நேரத்தில் புறப்பட்ட SLTB பேருந்து

அனுராதபுரம் பழைய பேருந்து நிலையத்திலிருந்து ஒரே நேரத்தில் புறப்பட்ட SLTB பேருந்து இலந்தகஹவெவ நோக்கியும், தனியார் பேருந்து கலா ஓயா நோக்கியும் பயணித்துள்ளன.

பயணத்தின்போது இரு பேருந்துகளின் பணியாளர்களுக்கும் இடையில் ஏற்பட்ட வாக்குவாதத்தைத் தொடர்ந்து இந்தத் தாக்குதல் இடம்பெற்றுள்ளதாக விசாரணைகளில் தெரியவந்துள்ளது.

சம்பவம் தொடர்பான காணொளியொன்றும் சமூக ஊடகங்களில் பரவி வருகிறது. இதனிடையே, சம்பவத்துடன் தொடர்புடைய தனியார் பேருந்தைப் பொலிஸார் கைப்பற்றியுள்ளனர்.

அதன் சாரதியும் நடத்துனரும் அங்கிருந்து தப்பிச் சென்றுள்ளதாகத் தெரிவிக்கப்படுகிறது. சந்தேக நபர்களைக் கைது செய்வதற்கான மேலதிக விசாரணைகளை அனுராதபுரம் தலைமையகப் பொலிஸார் முன்னெடுத்து வருகின்றனர்.