மெட்ரோ பஸ்ஸை மோதிய தனியார் பஸ்ஸுக்கு தடை!

அத்துருகிரிய நகரிலுள்ள வழித்தட இலக்கம் 170 பஸ் நிறுத்தத்துக்கு முன்பாக மெட்ரோ (Metro) பஸ்ஸுடன் மோதி விபத்துக்குள்ளான தனியார் பஸ்ஸுக்கு தற்காலிக வீதிப் போக்குவரத்துத் தடை விதிக்கப்பட்டுள்ளது.

நேற்று (8) இடம்பெற்ற இந்த விபத்து தொடர்பாக அத்துருகிரிய பொலிஸார், மோட்டார் வாகனப் பரிசோதகர் ஊடாக குறித்த தனியார் பஸ்ஸை பரிசோதனைக்கு உட்படுத்தினர்.

பஸ் முறையாகப் பராமரிக்கப்படவில்லை
இதன்போது, அந்த பஸ் முறையாகப் பராமரிக்கப்படவில்லை எனக் கண்டறியப்பட்டதை அடுத்து, அதற்குத் தற்காலிக வீதிப் போக்குவரத்துத் தடை விதிக்க நடவடிக்கை எடுக்கப்பட்டுள்ளது.

அத்துருகிரிய – புறக்கோட்டை வழித்தடத்தில் பயணிக்கும் குறித்த தனியார் பஸ், அத்துருகிரிய பஸ் நிலையத்தில் நிறுத்துவதற்காகப் பிரதான வீதியைக் கடந்து பின்னோக்கி நகர்த்தப்பட்ட போதே, மில்லேனியம் சிட்டி – புறக்கோட்டை வீதியில் பயணித்த மெட்ரோ பஸ்ஸுடன் மோதி விபத்துக்குள்ளாகியுள்ளது.

இந்த விபத்து தொடர்பான சிசிடிவி (CCTV) காணொளிப் பதிவுகள் பெறப்பட்டுள்ளதுடன், அது தொடர்பான தகவல்களை இன்று (9) கடுவலை நீதிமன்றத்தில் சமர்ப்பிக்கவும் பொலிஸார் நடவடிக்கை எடுத்துள்ளனர்.

மேலும், இரு சாரதிகளும் போதைப்பொருள் பரிசோதனைக்கு உட்படுத்தப்பட்ட போதிலும், அவர்கள் எவரும் போதைப்பொருள் பயன்படுத்தியிருக்கவில்லை என்பது பரிசோதனை அறிக்கைகளின் மூலம் உறுதி செய்யப்பட்டுள்ளதாகப் பொலிஸார் தெரிவித்தனர்.