உலக முட்டை தினம்: நாவிதன்வெளியில் கர்ப்பிணிப் பெண்களுக்கு முட்டைகள் வழங்கி வைப்பு

உலக முட்டை தினத்தை முன்னிட்டு நாவிதன்வெளி அரச கால்நடை வைத்தியர் அலுவலகத்தின் ஏற்பாட்டில் கர்ப்பிணிப் பெண்களுக்கு முட்டைகள் வழங்கும் விசேட சமூக நலன்புரி நிகழ்வு வெள்ளிக்கிழமை (09)   நடைபெற்றது.

நாவிதன்வெளி அரச கால்நடை வைத்தியர் டாக்டர் திருமதி மயூரன் யாமினி அவர்களின் தலைமையில் நடைபெற்ற இந்நிகழ்வில், நாவிதன்வெளி பிரதேச சுகாதார வைத்திய அதிகாரி பிரிவிற்குட்பட்ட 25 கர்ப்பிணிப் பெண்களுக்குத் தலா 25 முட்டைகள் வீதம் உத்தியோகபூர்வமாக வழங்கி வைக்கப்பட்டன.

இந்நிகழ்வில் நாவிதன்வெளி சுகாதார வைத்திய அதிகாரி, பொதுச் சுகாதாரப் பரிசோதகர்கள், குடும்ப நல சுகாதார உத்தியோகத்தர்கள் (Midwives) மற்றும் கால்நடை வைத்திய அதிகாரி அலுவலக உத்தியோகத்தர்கள் உட்படப் பலரும் கலந்து சிறப்பித்தனர்.

நிகழ்வின் போது தலைமை உரையாற்றிய அரச கால்நடை வைத்தியர் டாக்டர் திருமதி மயூரன் யாமினி, முட்டையைத் தினசரி உணவில் சேர்த்துக்கொள்வதன் மூலம் கர்ப்பிணிப் பெண்கள், பாலூட்டும் தாய்மார்கள் மற்றும் குழந்தைகளுக்குக் கிடைக்கும் புரதம், வைட்டமின்கள், தாதுப்பொருட்கள் உள்ளிட்ட அத்தியாவசிய ஊட்டச்சத்து நன்மைகள் குறித்துக் கர்ப்பிணிப் பெண்களுக்கு விரிவான விழிப்புணர்வை வழங்கினார்.

கர்ப்பிணிப் பெண்களின் போஷாக்கு மட்டத்தை உயர்த்தும் நோக்குடனும், முட்டையின் ஊட்டச்சத்து முக்கியத்துவத்தை வலியுறுத்தும் வகையிலும் அமைந்த இந்நிகழ்வு, கால்நடை உற்பத்தி மற்றும் சுகாதாரத் திணைக்களத்தின் கிழக்கு மாகாணத்திற்கான PSDG 2026 வேலைத்திட்டத்தின் நிதி ஒதுக்கீட்டின் கீழ் ஏற்பாடு செய்யப்பட்டிருந்தமை குறிப்பிடத்தக்கது.