;
Athirady Tamil News

போராட்டத்தில் குதிக்கும் ஆசிரியர்கள் அதிபர்கள்

0

எதிர்வரும் 30-ஆம் திகதி நாடளாவிய ரீதியில் உள்ள அனைத்து ஆசிரியர்களும் அதிபர்களும் சுகவீன விடுமுறை அறிவித்து தொழிற்சங்க நடவடிக்கையில் ஈடுபடவுள்ளதாக இலங்கை ஆசிரியர் சங்கம் தெரிவித்துள்ளது.

கொழும்பில் நடைபெற்ற தொழிற்சங்கப் பிரதிநிதிகளின் விசேட கூட்டத்தையடுத்து இந்தத் தீர்மானம் அறிவிக்கப்பட்டுள்ளது.

ஆசிரியர்கள் மற்றும் அதிபர்களின் சம்பளம் தொடர்பான நீண்டகாலப் பிரச்சினைகளுக்கும் ஏனைய கோரிக்கைகளுக்கும் 2027 வரவு செலவுத் திட்டத்தில் எவ்விதத் தீர்வும் வழங்கப்படவில்லை எனத் தொழிற்சங்கப் பிரதிநிதிகள் குற்றம் சுமத்தியுள்ளனர்.

இதற்கு முன்னர் மேற்கொள்ளப்பட்ட சம்பளத் திருத்தங்கள் இருந்தபோதிலும், அதிகரித்து வரும் வாழ்க்கைச் செலவு காரணமாகத் தமது சம்பளத்தின் உண்மையான பெறுமதி வெகுவாகக் குறைந்துள்ளதாக அவர்கள் கவலை வெளியிட்டுள்ளனர்.

கல்வி அமைச்சிற்கான வரவு செலவுத் திட்ட ஒதுக்கீடுகள் மீதான பாராளுமன்ற விவாதம் எதிர்வரும் டிசம்பர் முதலாம் திகதி நடைபெறவுள்ள நிலையில், அரசாங்கத்தின் கவனத்தை ஈர்க்கும் வகையிலேயே நவம்பர் 30-ஆம் திகதி திட்டமிட்டுத் தெரிவு செய்யப்பட்டுள்ளதாகத் தொழிற்சங்கங்கள் சுட்டிக்காட்டியுள்ளன.

தமது இந்தப் போராட்டத்தை அரசாங்கம் தீவிரமாகக் கருத்தில் கொண்டு, வரவு செலவுத் திட்டத்தின் எஞ்சிய கட்டங்களிலாவது கல்வித் துறை சார்ந்த நீண்டகாலப் பிரச்சினைகளுக்கு அர்த்தமுள்ள தீர்வுகளை முன்வைக்க வேண்டும் எனத் தொழிற்சங்கங்கள் வலியுறுத்தியுள்ளன.

அத்துடன், இந்த வேலைநிறுத்தப் போராட்டம் காரணமாக நாடளாவிய ரீதியில் பாடசாலைகளின் கல்வி நடவடிக்கைகள் பாதிக்கப்படக்கூடும் எனவும் தொழிற்சங்கங்கள் எச்சரித்துள்ளன.

You might also like

Leave A Reply

Your email address will not be published.